ԵՐԵՎԱՆ, 23 փետրվարի- Sputnik. 2015թ.-ի մայիսին «Զանգեզուրի պղնձամոլիբդենային կոմբինատ» ՓԲԸ-ից հաղորդագրություն է ստացվել ավտոմեքենաների ներքին կայանատեղում անօրինական կազմված փաստաթղթերի մասին, որոնց համաձայն` երրորդ անձանց հատկացվել և տրվել է շուրջ 9 տոննա վառելիք։
Մոտավորապես նույնքան վառելիք է ծախսում կոմբինատը 40 օրվա աշխատանքի ընթացքում։
Մի քանի օր անց` 2015թ.-ի մայիսի 21-ին, կոմբինատի աշխատող Գոռ Ստեփանյանին խոշոր խարդախության և փաստաթղթերը կեղծելու մեղադրանք է ներկայացվել ՀՀ ՔՕ 178 հոդվածի երրորդ կետի առաջին մասով և ՔՕ 325 հոդվածի երրորդ մասով։
«Մեղադրյալ Ստեփանյանի նկատմամբ խափանման միջոց է ընտրվել կալանքը։ Միաժամանակ Ստեփանյանն ազատ է արձակվել 2015թ.-ի դեկտեմբերի 7-ին և կրկին կալանավորվել 2016թ.-ի հունվարի 11-ին»,- նշեց Խաչիկյանը։
Գոռ Ստեփանյանը պղնձամոլիբդենային կոմբինատում սկսել է աշխատել 2015թ.-ի հունվարին և աշխատել է մինչև նույն տարվա մայիսը։
«2016թ.-ի հունվարի 22-ին Գոռ Ստեփանյանի նաև մեղադրանք է առաջադրվել, որով նա իբր կեղծել է փաստաթղթերը և հափշտակել 73 670 00 դրամ (149 205 դոլար) արժողությամբ բենզին և դիզելային վառելիք»,- ասաց փաստաբանը և ավելացրեց, որ այդ մեղադրանքը ոչ մի հիմք չունի։
Նա նաև նշեց, որ մեղադրող կողմը բոլոր միջոցներով փորձում է կալանքի տակ պահել Ստեփանյանին, քանի որ նախորդ մեղադրանքի համաձայն` Ստեփանյանին պաշտպանող կողմի աջակցությամբ ազատ արձակելու հնարավորությունը մեծ էր։
«Նոր մեղադրանքով ստացվում է, որ կոմբինատում միջին պաշտոն զբաղեցնող աշխատողը կարողացել է մեքենայությունների ճանապարհով ինքնուրույն չորս ամսվա ընթացքում գողանալ այդքան վառելիք։ Հարց է ծագում` իսկ որտեղ են եղել ղեկավարությունը և մյուսները»,- հայտարարեց Խաչիկյանը։
Այսօրվա դրությամբ նախաքննությունը շարունակվում է և գտնվում է ՀՀ քննչական կոմիտեի հատկապես կարևոր գործերի հետաքննության գլխավոր վարչության վարույթում։ Պաշտպանները պնդում են, որ Գոռ Ստեփանյանն ապօրինաբար է գտնվում կալանքի տակ։
