ԵՐԵՎԱՆ, 23 փետրվարի — Sputnik. ՀՀԿ խմբակցության պատգամավոր Մհեր Սեդրակյանն անհարգալից չի խոսել լրագրողների հետ, ասաց խմբակցության ղեկավար Վահրամ Բաղդասարյանը։
Մի քանի օր առաջ ՀՀԿ խմբակցության պատգամավոր Մհեր Սեդրակյանը լրագրողներին «նախիր» է անվանել և հայհոյել։ Դեպքից երկու օր անց Սեդրակյանը հայտարարել է, որ ինքը որևէ մեկին «նախիր» չի ասել։
«Ես զրուցել եմ նրա հետ։ Դա եղել է պարզապես բորբոքվածություն, բայց Մհեր Սեդրակյանը ժխտում է, որ եղել է հայհոյանք։ Ես կոչ եմ անում լրագրողներին նույնպես մի փոքր զգոն լինել, ու այդ ժամանակ ամեն ինչ լավ կլինի։ Նման միջադեպեր լինում են», — ասաց Բաղդասարյանը։
Նրա խոսքով` որ մի հայհոյանք էլ չի եղել։ Պարզապես ցանկացել է, որ սենյակում առանձին զրուցի իր տղայի տարիքի լրագրողի հետ, ինչը չի ստացվել:
«Ինձ թվում է, որ իրենք առանձնազրույց կունենան, և այդ ճշտումները կկատարվի», — ասաց Բաղդասարյանը։
Ինչ վերաբերում է կարգապահական տույժին, պատգամավորը նշեց. «Դրանով էթիկայի հանձնաժողովն է զբաղվում: Եթե խնդիր լինի, իհարկե կանդրադառնա»։
Լրագրողները շրջապատեցին նաև պատգամավոր Սամվել Ալեքսանյանին ու փորձեցին նրա կարծիքն իմանալ կուսակից ընկերոջ` Մհեր Սեդրակյանի պահվածքի վերաբերյալ։
Պարզվեց` Ալեքսանյանը դիտել է տեսանյութը և նույնպես ոչ մի վիրավորական արտահայտություն չի լսել։
Այս ամենի հետ մեկտեղ ՀԱԿ խմբակցության անդամ Արամ Մանուկյանը բոլորովին այլ թեմայից սկսեց իր ելույթը։ Նրան անհանգստացնում է տղամարդ պատգամավորների ավանդական «ողջույնի» ձևը, ու այդ պատճառով խոսքը սկսեց նրանից, որ լավ կլինի` տղամարդիկ չհամբուրեն իրար։
«Տգեղ է, մի համբուրվեք, Վրաստանից եկած վատ սովորություն է։ Ես կուսակցությունում արգելել եմ համբուրվել», — ասաց Մանուկյանը։
ԱԺ փոխխոսնակ Էդուարդ Շարմազանովն էլ կատակեց. «Կարևորը` Հուդայի համբույր չլինի»։
Լրագրողների հետ շփվող Ալեքսանյանին մի պահ մոտեցավ պետաիրավական հարցերի հանձնաժողովի ղեկավար Հովհաննես Սահակյանը և կատակով նշեց, որ «վստահ է այն մարդկանց հարցում, որոնց հետ համբուրվում է»։
Իսկ այդ ընթացքում պատգամավորներն ԱԺ ամբիոնից շարունակում էին քննարկել նոր օմբուդսմենի թեկնածությունը, ավելի ճիշտ` նրա անթերի կերպարը։
