ԵՐԵՎԱՆ, 23 փետրվարի-Sputnik. Տեղեկատվության ազատության կենտրոնը 2 տարվա անդադար պայքարից հետո հասավ իր ուզածին։ Սահմանադրական դատարանը «Տեղեկատվության ազատության մասին» օրենքի որոշ դրույթներ սահմանեց սահմանադրությանը հակասող և անվավեր։ Իսկ Ազգային ժողովին պատվիրակեց այս օրենքում փոփոխություններ կատարել։
«Օրենքով սահմանված էր, որ տեղեկատվության համար պետք է պետական տուրք վճարել։ Օրենքում տարբերակում արված չէր մարդու անձին վերաբերող տեղեկությունների մասով և այն տեղեկությունների, որոնց համար տեղեկատվության ազատության մասին օրենքով նախատեսված է տեղեկատվության տրամադրման ավելի ազատ ռեժիմ»,-ասաց իրավապաշտպան Արտակ Զեյնալյանը։
2013 թվականին Տեղեկատվության ազատության կենտրոնին անհրաժեշտ է եղել տեղեկություններ ճշտել Մաշտոցի պողոտայում գտնվող Փակ շուկայի շինարարության վերաբերյալ` տարածքն ում է տրվել և ինչ պայմանով։ Կառավարությանն առընթեր անշարժ գույքի պետական կոմիտեն մերժել էր տեղեկության տրամադրման հայցը։
«Մերժել էին ինչպես գործադիր իշխանության մարմինները, այնպես էլ` դատարանները»,-ասաց Զեյնալյանը։
«Սահմանադրությունն ավելի բարձր է» նշանաբանով տեղեկատվության ազատության կենտրոնը վերականգնել է ինչպես իր, այնպես էլ այլ կազմակերպությունների ու լրատվամիջոցների իրավունքը։
