ԵՐԵՎԱՆ, 22 փետրվարի — Sputnik. Հայաստանում 50-ն անց կինը կյանքի ընթացքում մոտ 10 աբորտ է անում։ Սակայն ավելի երիտասարդ կանայք` մինչև 40 տարեկան, միջինը 4-5 անգամ են ընդհատում հղիությունը։
Գինեկոլոգ Նելլի Ավագյանի խոսքով` իրավիճակը փոխվում է. շատերը սկսում են հասկանալ, որ անհրաժեշտ է ճիշտ պաշտպանվել սեռական հարաբերությունների ժամանակ ու գործը աբորտի չհասցնել։ Աբորտ անելը արդարացվում է միայն այն դեպքում, երբ հղիության ընթացքում կինը վարակվել է որևէ ինֆեկցիայով կամ վիրուսով։
Ինչ վերաբերում է սելեկտիվ աբորտներին, ապա դրանց թիվը նույնպես նվազել է։ Ազգային վիճակագրական տվյալների համաձայն` Հայաստանում 2015 թվականին ծնվել է 19611աղջիկ ու 22204 տղա (2014 թվականին` 20162 աղջիկ և 22869 տղա)։
Բացի այդ` աբորտները կարող են վատ հետևանքներ ունենալ, դրանք կարող են հանգեցնել չբերության ու նույնիսկ մահվան ելք ունենալ։
«Չբերության կարող են բերել նաև արտաքին գործոնները, օրինակ` սխալ սնվելը, որը բերում է ավել քաշի առաջացման, ԳՄՕ պարունակող սննդի, տապակած ուտեստների օգտագործումը և այլ գործոններ», — մամուլի ասուլիսի ժամանակ ասաց Ավագյանը։
Բժշկի խոսքով` շատ կարևոր է երեխա պլանավորելուց առաջ հետազոտվել, ընդ որում` կարևոր չէ դա առաջի՞ն, թե՞ երկրորդ հղիությունն է։
Այսօր, ինչպես աշխարհում, այնպես էլ Հայաստանում ընտանիքի պլանավորման մի շարք կենտրոններ են գործում։ Զույգերը դիմում են կենտրոն երեխա ունենալուց առաջ, բժիշկները հետազոտում են, որից հետո նրանք կարող են առողջ երեխա ունենալ։
Այսօր աշխարհում մարդու մահացության հիմնական պատճառն են սրտանոթային հիվանդությունները, քաղցկեղը, շաքարային դիաբետն ու օստեոպորոզը։ Սակայն այդ հիվանդությունները նույնպես կարելի է կանխել` առողջ կյանք վարելու, ճիշտ սնվելու, մարմնամարզությամբ զբաղվելու, շատ քայլելու դեպքում։ Բժիշկները խորհուրդ են տալիս հետևել արյան ճնշմանն ու քաշին։
