Հայկ Օրդյան, Sputnik.
Հանճարեղ վավերագրող, դիստանցիոն մոնտաժի հեղինակ, աշխարհահռչակ ռեժիսոր Արտավազդ Փելեշյանի ծննդյան օրը «Օրդֆիլմ» ֆիլմարտադրող ընկերության հիմնադիր Հայկ Օրդյանը, ով բազմիցս առիթ է ունեցել շփվել տաղանդաշատ վավերագրողի՝ Արտավազդ Փելեշյանի հետ, շնորհավորելով նրան, մի փոքրիկ դրվագ է հիշում Մեծ վարպետի հետ հանդիպումից: Դրվագ, որ շատ ավելին է պատմում նրա մասին և՛ որպես անհատականություն, և՛ որպես արվեստագետ: Sputnik Արմենիան ևս միանում է շնորհավորանքին:
– «Մոսկվա» կինոթատրոնում կազմակերպում էինք Արտավազդ Փելեշյանի հանդիպում-երեկոն, որտեղ նաև պիտի ցուցադրվեին վարպետի չորս ֆիլմերը: Լարված աշխատում էինք, որպեսզի ամեն ինչ լինի անթերի և բարձր մակարդակով: Կարևոր խնդիրներից մեկն էլ այն էր, որ այդ ֆիլմերը՝ «Տարվա եղանակները», «Բնիկները», «Վերջը» և «Կյանքը», վարպետի պահանջով պիտի ցուցադրվեին կինոժապավենով: Իսկապես բավականաչափ պատասխանատու խնդիր էր, մանավանդ, որ ժապավենները երկար ժամանակ չէին ցուցադրվել… Լարված էր նաև վարպետը: Սակայն երբ լեփ-լեցուն դահլիճի լույսերն անջատվեցին և սկսվեց կինոցուցադրումը, Փելեշյանը վերափոխվեց, դարձավ ավելի ինքնամփոփ և առավել խաղաղված: Նա կարծես վերաիմաստավորելով իր ստեղծած գլուխգործոցները, փորձում էր նոր հայացքով դիտել երեկվա արվածը: Այս ամենի հետ մեկտեղ Արտավազդ Աշոտովիչը, պարտադիր, կարճ ռեպլիկներով պահանջում էր տեխնիկական այս կամ այն շտկումները:
Իմ խորին համոզմամբ, վարպետը բաց չթողեց ոչ մի կադր և նույնիսկ ոչ մի հնչյուն: Ամեն ինչ հրաշալի անցավ: Երբ ավարտվեց երեկոն, նա կամաց շշնջաց. «Հը՞, ոնց որ նայվեց, չէ՞…»: Այս հարցի պատասխանը նա բոլորիցս լավ գիտի. Իհարկե, նայվեց, և նայվելու են դեռ երկար-երկար տարիներ: Նա գիտի նաև, որ մարդիկ այս ֆիլմերով ևս հասկանալու են իրական կինոարվեստի արժեքը: Սա հանճարեղ ռեժիսորի ստեղծած արվեստի համեստ ինքնագնահատականն էր…
Հ.Գ. Հանդիսատեսի շարքերում ընդամենը մի քանի գործող ռեժիսորի նկատեցի: Հետևությունները թողնում եմ Ձեզ։
