ԵՐԵՎԱՆ, 22 փետրվարի- Sputnik. Գիտնականները պարզել են, որ ամենահին զգեստը կարվել է ավելի քան 5000 տարի առաջ: Հայտնագործության շնորհիվ հնարավոր կլինի ծանոթանալ հին Եգիպտոսի բարձր նորաձևությանը, գրում է «Վեստին»:
Հետազոտողները պարզել են, որ զգեստը եղել է բաց մոխրագույն՝ V-նման բացվածքով և մանր ծալքերով: Բացի այդ, զգեստն ունեցել է գեղեցիկ մանրածալքերով թևքեր, ինչը վկայում է, որ հնում «դիզայներները» բարդ աշխատանք են կատարել:
Գիտնականների կարծիքով՝ զգեստը պատկանել է վերնախավի որևէ ներկայացուցչի, բարեկազմ աղջկա, քանի որ նման զգեստ կարող էր կարել միայն իր ծառայությունները թանկ գնահատող վարպետը:
Հնագետներին զարմացրել է այն փաստը, որ նման արագ փչացող կտորն ընդհանրապես հասել է մեր օրեր:
Օքսֆորդի համալսարանի գիտնական Մայքլ Դիի ղեկավարությամբ աշխատող մասնագետները կտորի ռադիոածխածնային վերլուծություն են անցկացրել և պարզել, որ այն ավելի քան 5000 հազար տարի դամբարանում է մնացել:
Հիմա, երբ զգեստի տարիքը որոշվել է, հետազոտողները կարող են վստահությամբ ասել, որ այսօրվա դրությամբ դա աշխարհի հնագույն զգեստն է:
