ԵՐԵՎԱՆ, 21 փետրվարի — Sputnik. «Օրինաց երկիր կուսակցության» նախագահ Արթուր Բաղդասարյանի նախաձեռնած «Հայկական վերածնունդ» միավորումը վերածվեց կուսակցության: Փետրվարի 21-ին Երևանի Կարեն Դեմիրճյանի անվան մարզահամերգային համալիրում Միավորման հիմնադիր համագումարի ժամանակ կուսակցություն հիմնելու մասին որոշումն ընդունվեց միաձայն:
«Իմ նախաձեռնության մեկնարկից հետո երկու հիմնական թեզ հրապարակ նետվեց. ՕԵԿ-ը հեղինակազրկված է, գնում է անվան փոփոխության, և Արթուր Բաղդասարյանին միանում են չեղած մարդիկ և կուսակցություններ: Եթե ՕԵԿ-ը հեղինակազրկված է, ինչպե՞ս է արդեն 20 տարի Ազգային ժողովում: Սա է հեղինակության իրական գնահատականը»,- ասաց Արթուր Բաղդասարյանը:
Ազգային ժողովի «Օրինաց երկիր» խմբակցության անդամ Հովհաննես Մարգարյանն էլ նշեց.
«Ազգի ու հայրենիքի համար պատմական, աննախադեպ իրադարձություն է տեղի ունենում. 150 կազմակերպություն և կուսակցություն հիմնադրում են նոր կուսակցություն՝ «Հայկական վերածնունդ միավորումը»:
Արթուր Բաղդասարյանն անդրադարձավ կուսակցության անվանմանը՝ շեշտելով, որ սիրում է «Օրինաց երկիր» անվանումը, սակայն միահամուռ որոշել են միավորվել և ստեղծել նոր ուժ, նոր միավորում:
«Ինչ վերաբերում է չեղած կուսակցությունների և մարդկանց մասին տեղեկություններին, ապա ասեմ՝ մեզ միացել է 40-50 հազար մարդ, մեզ միացած ցանկացած կուսակցությունում կա 2-3 հազար մարդ»,- ասաց Արթուր Բաղդասարյանը:
Արթուր Բաղդասարյանը հորդորեց համախմբվել և պայքարել հանուն հայկական վերածննդի:
Ազգային ժողովում ներկայացված քաղաքական ուժերից համագումարին մասնակցում էին միայն ՕԵԿ ներկայացուցիչները:
