ԵՐԵՎԱՆ, 21 փետրվարի — Sputnik, Ադրինե Թորոսյան. Հարցին լուծում տալու հնարավորություն այլևս չկա, քանի որ համայնքային տուրքերն այս տարվա համար արդեն հաստատված են,- վարորդներին պատասխանեց Վանաձորի քաղաքապետ Սամվել Դարբինյանը:
«Տարվա համար հաստատվում է և այլևս փոփոխության ենթակա չէ: Ուրեմն՝ մենք չենք կարող այլևս այդ խնդիրը վերանայել: Ձեր հարկը կվերանայվի եկող տարի՝ 2017 թվականի բյուջեն հաստատելուց առաջ: Նաև ասեմ, որ ես չեմ կարծում, թե դա շատ մեծ բեռ է»,-ասաց քաղաքապետ Սամվել Դարբինյանը:
Բնակիչները վրդովվեցին, պնդեցին, որ այդ գումարն իսկապես մեծ բեռ է իրենց համար: Հիշեցրին, որ նման գին չի սահմանվել նույնիսկ Երևանում:
«Վերոնշյալ օրենքը թույլ է տալիս տուրք սահմանել 0-ից մինչև 10 հազար դրամ՝ գումարած 1,5 տոկոս. արդյո՞ք սահմանված 15 հազար դրամ տուրքը համապատասխանում է Վանաձոր քաղաքի սոցիալական ծանր պայմաններին: Իհարկե ոչ»,- բողոքեցին վանաձորցի վարորդները:
Հետո հիշեցին, թե ինչպես էր տրանսպորտի նախարարը Վանաձորում խոստացել, որ ամսական 8 հազար դրամից բացի, այլ վճարումներ չեն լինելու:
«ՀՀ ավտոճանապարհներից ամենաանմխիթար վիճակը Վանաձոր քաղաքինն է, որի պատճառով մեկ երթի դիմաց ստանալով 600 դրամ՝ փոխարենը կրում ենք հազարավոր դրամների վնաս: Ծայրահեղ անմխիթար վիճակում են գտնվում բոլոր հիվանդանոցների ու թաղամասերի բակերը, երկրորդական ճանապարհները: Շարքային աշխատողների քրտինքով աշխատած գումարներից գանձված հարկերը անորակ ասֆալտի տեսքով լցվում են ջրափոսերը: Գույքահարկ վճարում ենք, տեխզննման համար վճարում ենք, ամսական տուրք՝ 8 հազար դրամը, վճարում ենք, թողեք մի քիչ էլ մեր ընտանիքների կարիքների համար վճարենք»,- բողոքեցին վանաձորցիները:
Այս համարձակ հայտարարությունները բնականաբար դուր չեկան քաղաքապետին:
«Աբսուրդի է նման: Օրական 70-80 դրամը շատ եք համարում համայնքային բյուջե վճարելու համար: Ոնց էլ լինի, օրական մի 2000 դրամ կաշխատեք»,- վարորդների եկամուտը հաշվեց քաղաքապետը:
«2000-ից 3000-ը տալիս ենք մեքենա սարքելուն, որովհետև ջարդվում է փոսերում: Մենք տեսել ենք, թե Վանաձոր քաղաքում ինչպես են փոսալցումները կատարվում. ջրի մեջ են լցնում, դա մեր քրտինքից, մեր տուրքերից է գնում: Վերահսկողություն չկա, ավերակներ է դառել քաղաքը, մենք այդ գումարը տանք, որ ջրափոսերը լցնե՞ն»,- տուրքի հետ կապված իրենց բուն դժգոհությունը հայտնեցին վանաձորցի վարորդները:
Քաղաքապետը, սակայն, հարցը փակված համարեց. «Ջուր ենք ծեծում, 2 տող կարդում ենք, երեք տող մեկնաբանություն անում»:
Վարորդները հայտարարեցին, որ չեն վճարելու սահմանված տուրքը և տաքսի ծառայության իրենց արտոնագրերը վերադարձնելու են նախարարությանը:
