ԵՐԵՎԱՆ, 21 փետրվարի- Sputnik. Հանրահայտ Beatles խմբի անդամ Ջոն Լենոնի մազափունջը 35 հազար դոլարով վաճառվել է ԱՄՆ-ի Դալաս քաղաքի Heritage Auctions աճուրդում, հայտնում է ՌԻԱ Նովոստին՝ հղում անելով Associated Press գործակալությանը:
Գործակալության տվյալով՝ 10 սմ երկարությամբ մազափունջը գնել է հիշարժան իրերի կոլեկցիոներ Փոլ Ֆրեյզերը:
Հատկանշական է, որ երաժշտի մազերը պահել էր գերմանացի վարսավիրը, ով կտրել է Լենոնի մազերը «Ինչպես ես հաղթեցի պատերազմում» ֆիլմի նկարահանումներից առաջ (1967թ.):
Լենոնի մազափնջից բացի, աճուրդում ներկայացվել են նաև լեգենդար խմբի հետ առնչվող այլ իրեր: Խմբի անդամների համատեղ լուսանկարը վաճառվել է 42,5 հազար դոլարով:
