ԵՐԵՎԱՆ, 21 փետրվարի — Sputnik. Վերջին տարվա ընթացքում Մեծ Բրիտանիայի բնակիչների մեկ երրորդն իր ճաշացանկում կրճատել է կարմիր մսի կիրառումը կամ բուսակեր է դարձել: British Social Attitudes-ի անցկացրած հարցումը ցույց է տվել, որ մարդկանց 29 տոկոսը հրաժարվել է մսից այն ժամանակ, երբ Առողջապահության համաշխարհային կազմակերպությունը հայտարարել է, որ վերամշակվող միսը կարող է քաղցկեղ առաջացնել:
Սակայն ԱՀԿ-ի հայտարարության մեջ նշվում էր նաև, որ մսից լիովին հրաժարվելը նույնպես կարող է բացասաբար անդրադառնալ մարդու առողջության վրա: Օրինակ՝ կարող է հանգեցնել նյութափոխանակության խանգարման, հանքային նյութերի ու միկրոտարրերի անբավարարության:
Գիտնականների խոսքով՝ մսամթերքից ընդհանրապես հրաժարվելու դեպքում մարդը կարող է մեկ ամսում շուրջ 4.5 կգ նիհարել:Իսկ դա կարող է նյութափոխանակության խանգարման և մարսողական համակարգի խնդիրներ առաջացնել: Մսից ու մսամթերքից հրաժարվելը կարող է աղիքների միկրոֆլորայի անդառնալի փոփոխման պատճառ դառնալ: Նման սննդակարգը կարող է նաև ստամոքսի խոց առաջացնել:
Մսից հրաժարվածների շուրջ 58 տոկոսն ասել է, որ այդ քայլը կատարել է առողջական վիճակից ելնելով: Շուրջ 20 տոկոսը խոստովանել է, որ փորձել է տնտեսել գումարը: Հարցվածների 20 տոկոսին էլ մտահոգել է կենդանիների բարեկեցությունը կամ սննդամթերքի անվտանգությունը:
