ԵՐԵՎԱՆ, 20 փետրվարի — Sputnik. Volvo ընկերությունը 59 հազար ավտոմեքենա է հետ կանչում 40 երկրից, հայտնում է ՌԻԱ Նովոստին՝ հղում անելով Ասսոշիեյթեդ Պրեսս գործակալությանը:
Ընկերության ներկայացուցիչ Ստեֆան Էլֆստրոմը հայտնել է, որ հետ կկանչվեն 2015 թվականին արտադրված 60 և 70 սերիայի 5 մխոցանի դիզելային մոդելները: Այդ ավտոմեքենաների մեծ մասը շահագործվում է Շվեդիայում, Մեծ Բրիտանիայում և Գերմանիայում:
Այս խնդրի մասին առաջինը խոսել են վարորդները՝ նշելով, որ մեքենայի շարժիչն անջատվել է՝ առանց նախազգուշական ազդանշանի: Ընկերության ներկայացուցչի խոսքով` ներկա պահին Volvo ավտոմեքենաների էլեկտրահամակարգի աշխատանքի հետևանքով որևէ պատահար չի գրանցվել:
Volvo ընկերությունը հիմնադրվել է 1927 թվականին, բեռնատար ավտոմեքենաների, ավտոբուսների, շինարարական տեխնիկայի, ինչպես նաև ծովային ու արդյունաբերական շարժիչների արտադրության ոլորտի առաջատար կազմակերպություններից մեկն է: Ընկերության գլխավոր գրասենյակը գտնվում է Գետեբորգում: Ընկերությունը շուրջ 100 հազար աշխատակից ունի:
