ԵՐԵՎԱՆ, 20 փետրվարի — Sputnik, Արմենուհի Մխոյան. Փետրվարի 20-ին, Գյումրու «8-րդ» ռուսական-զինվորական թաղամասում գործող թիվ 19 դպրոցի մի մասնաշենքը վերանորոգումից հետո բացվեց ռուս զինծառայողների ընտանիքների անդամների առջև՝ որպես հոգևոր-մշակութային կենտրոն:
Կենտրոնը գործելու է Ռուսիո պատրիարքության և Հարավային ռազմական օկրուգի 102-րդ ռազմակայանի հիմքում: Նախաձեռնության հեղինակը՝ Հայր
Անդրեյ Վացը, շնորհավորելով բոլորին կենտրոնի բացման առթիվ, հույս հայտնեց, որ այն կդառնա ռուս զինվորականների ընտանիքների անդամների ու հենց իրենց՝ զինվորականների սիրած վայրը:
Ֆիլմերի դիտում ու քննարկում, այկիդոյի խմբակ, դասասենյակ, իսկ ամենակարևորը «Սուրբ Մատրիոնա Մոսկվացու» անունը կրող փոքրիկ եկեղեցի:Կենտրոնի այցելուները կկարողանան ոչ միայն մարտարվեստի դասեր ստանալ, այլև՝ խորացնել իրենց քրիստոնեկան գիտելիքները: Հայր Անդրեյ Վացն օծեց եկեղեցին ու կենտրոնը:
«Ճիշտ է՝ մինչ այս կենտրոնի բացումը շատ էր խոսվում մանկապարտեզի կարևորության մասին, ինչը ես ևս չեմ ժխտում, բայց անչափ կարևոր եմ համարում հոգևոր-մշակութային կյանքը, երեխաների հոգևոր դաստիարակությունը: Սա նոր հնարավորություն է, որ ռուս սպան զգա, որ ինքը ոչ միայն զինվորական է, այլ նաև ընտանիքի անդամ ու իր ընտանքի հետ մտնի եկեղեցի ու աղոթի, կամ տեսնի թե ինչպես է պարապում իր երեխան: Այստեղ նաև ծրագրում ենք ստեղծել ֆիտնես-կենտրոն և սրճարան, որպեսզի սպան իր ազատ ժամանակն անցկացնի ընտանիքի հետ»,-նշեց վարդապետ Անդրեյ Վացը՝ շնորհակալություն հայտնելով այն մարդկանց, ովքեր օգնել են վերանորոգել կառույցը:
Կենտրոնի շինարարական աշխատանքների իրականացման համար ծախսվել է մոտ 6 մլն դրամ, ևս 1 մլն 600 հազար դրամ գումար էլ պահանջվել է եկեղեցական պարագաների համար:
«Ռուսական Նահատակ սուրբ Ալեքսանդրիայի եկեղեցին կար, բայց այն հեռու է՝ 102-րդ ռազմակայանի տարածքում, իսկ այս եկեղեցին անմիջապես թաղամասում է, ինչն անչափ հարմար է հատկապես երեխա ունեցող մայրերի համար, կարելի է ցանկացած պահի գալ ու մոմ վառել, բացի այդ, երբ որդիս մեծանա, կհաճախի այկիդոյի պարապմունքների: Անչափ շնորհակալ ենք այս կենտրոնի համար»,- նշեց Օլգա Վոլնիխը:
