ԵՐԵՎԱՆ, 20 փետրվարի — Sputnik. Հայոց ցեղասպանությանը նվիրված քննարկումը կանցկացվի փետրվարի 25-ին, այս մասին տեղեկացնում է Բունդեսթագի պաշտոնական էջը:
Քննարկումը նախաձեռնել է Բունդեսթագի «Դաշինք 90/Կանաչներ» կուսակցությունը, որի համանախագահն ազգությամբ թուրք է՝ Ջեմ Օզդեմիրը: Հարցի քննարկմանը կտրամադրվի 45 րոպե:
«Դաշինք 90/Կանաչներ» կուսակցություն բազմաթիվ անգամ դատապարտել է Հայոց ցեղասպանությունը՝ Թուրքիային հորդորելով ճանաչել պատմական իրողությունը:
Գերմանիայի խորհրդարանը 2005 թվականին Հայոց ցեղասպանությունը ճանաչելու մասին որոշում է ընդունել, սակայն այդ որոշման մեջ «ցեղասպանություն» բառի փոխարեն նշվել է «կոտորած» բառը: 2015 թվականի ապրիլի 23-ին Գերմանիայի նախագահ Յոախիմ Գաուկը Բեռլինի Մայր տաճարում Հայոց ցեղասպանության հիշատակին նվիրված արարողության ժամանակ իր ելույթում օգտագործել էր «ցեղասպանություն» բառը:
