ԵՐԵՎԱՆ, 20 փետրվարի — Sputnik. Երկրագնդի բնակչության կեսը մինչև 2050 թվականը կարճատես կդառնա, նման մտահոգիչ եզրակացության են եկել Բրայան Հոլդենի տեսողության ինստիտուտի, Նոր Հարավային Ուելսի համալսարանի (Ավստրալիա) ու աչքի գիտահետազոտական ինստիտուտի (Սինգապուր) գիտնականները:
Ինչպես գրում է vokrugsveta.ru կայքը, ակնաբույժների կանխատեսումների համաձայն՝ 2000-2050 թվականներին կարճատեսների թիվը կավելանա 7 անգամ, իսկ կարճատեսությունը կուրության հիմնական պատճառ կդառնա:
Գիտնականների կարծիքով՝ տեսողությունը կորցնող մարդկանց թվի ավելացումը կապված է շրջակա միջավայրի ազդեցության, ինչպես նաև մաքուր օդում անցկացրած ժամանակի կրճատման ու աշխատանքային օրվա տևողության ավելացման հետ:
Ակնաբույժները համոզված են՝ իրավիճակը կարող է փոխվել, եթե կարճատեսության կանխարգելման համակարգ ստեղծվի: Այսօրվա դրությամբ կարճատեսների թիվը 2000 թվականի համեմատ ավելացել է 5 անգամ:
Իրավիճակը բարելավելու համար երեխաները պետք է տեսողության ամենամյա ստուգում անցնեն, ավելի շատ ժամանակ անցկացնեն մաքուր օդում ու քիչ օգտվեն բջջային սարքերից: Բացի այդ, հետազոտության հեղինակները կարծում են, որ կարճատեսության կանխարգելման ու բուժման համար կարելի է օգտագործել ժամանակակից միջոցներ, օրինակ՝ գիշերային հատուկ կոնտակտային լինզաներ:
