ԵՐԵՎԱՆ, 20 փետրվարի — Sputnik. Սոցիալական արդարության համաշխարհային օրը (World Day of Social Justice) նշվում է 2009 թվականից: ՄԱԿ-ի գլխավոր վեհաժողովը տոնը հիմնելու մասին հայտարարել է 2008 թվականի դեկտեմբերի 18-ին ընդունված բանաձևով:
ՄԱԿ-ի անդամ պետությունները փետրվարի 20-ին ազգային մակարդակով միջոցառումներ են անցկացնում՝ նպաստելով սոցիալական արդարության ամրապնդմանը: Կազմակերպիչների խոսքով` այդ օրը պետք է նպաստի աղքատությունն արմատախիլ անելուն, մարդկանց զբաղվածության ապահովմանը, կանանց և տղամարդկանց հավասարության, սոցիալական բարեկեցության և արդարության հաստատմանը:
«Սոցիալական արդարութունն ազգային կայունության և համընդհանուր բարեկեցության հիմքն է: Հավասար իրավունքները, համերաշխություն ու մարդու իրավունքների հանդեպ հարգանքը չափազանց կարևոր են ազգերի ու ժողովուրդների արդյունավետ ներուժի լիակատար յուրացման համար»,- ասել է ՄԱԿ-ի գլխավոր քարտուղար Պան Գի Մունը:
