ԵՐԵՎԱՆ, 19 փետրվարի- Sputnik. Հայոց բանակի տարեդարձի և Խորհրդային բանակի օրվա կապակցությամբ գեղեցիկ սեռի ներկայացուցիչները Հայաստանում Ռուսաստանի դեսպանի տիկնոջ` Սվետլանա Ռամիշվիլիի գլխավորությամբ, երգեցին «Մեր անունն է հայկական բանակ» հայտնի երգը։
Դահլիճում հավաքվածները հաճելիորեն զարմացան, իսկ հայ հյուրերը ժպիտներով քաջալերեցին երգչուհիներին։
Հայաստանի ԶՈՒ գլխավոր շտաբի պետ Յուրի Խաչատուրովն իր բարձր գնահատականն արտահայտում էր ակտիվ ժեստերով և դիմախաղով, իսկ պաշտպանության նախարար Սեյրան Օհանյանը ժպիտով հետևում էր կատարմանն ու ինչ-որ բան շշնջում ռուս դեսպանի ականջին։
«Փետրվարի 23-ը նշանակալի օր է Ռուսական պետության պատմության մեջ։ Հայրենիքի պաշտպանի օրը տոն է, որը ոչ միայն բարձր պետական կարգավիճակ ունի, այլ նաև հիրավի համազգային բնույթ է կրում։ Ի սկզբանե այդ օրվա մեջ խորը իմաստ էր դրված` սիրել հայրենիքը և պաշտպանել այն»,- ողջույնի խոսքում ասաց Հայաստանում Ռուսաստանի արտակարգ և լիազոր դեսպան Իվան Վոլինկինը։
Նա ուրախությամբ նշեց այն փաստը, որ տոնը միշտ նշվում է Հայաստանի զինված ուժերի ներկայացուցիչների հետ (միջոցառմանը մասնակցում էր ողջ բարձրագույն հրամանատարությունը՝ նախարար Սեյրան Օհանյանի գլխավորությամբ)։
«Հայրենիքի պաշտպանի օրը ծնվել է Խորհրդային բանակի օրից։ Բանակ, որտեղ կռվել են Խորհրդային Միության բոլոր նախկին պետությունների քաղաքացիները։ Ուստի այդ օրը միայն ռուսական պատմության էջ չէ։ Այն մեր ընդհանուր պատմության մասն է, մեր ընդհանուր տոնը»,- նշեց դիվանագետը։
Նրա կարծիքով` ռուս-հայկական ռազմաքաղաքական համագործակցությունը կարևորագույն տարր է երկկողմ հարաբերությունների մեջ, համապատասխանում է երկու պետության շահերին և մեծ աշխարհաքաղաքական նշանակություն ունի տարածաշրջանում։
Իզուր չէ, որ ռուսներն ու հայերը կողք կողքի մարտնչել են պատերազմներում, միմյանց օգնության ձեռք մեկնել ծանր պահերին։ Նա համոզմունք հայտնեց, որ մեր երկրների, բանակների և ժողովուրդների միջև ընկերական և դաշնակցային հարաբերությունները կպահպանվեն դարեր շարունակ։
Վոլինկինն առանձնահատուկ շնորհակալություն հայտնեց միջոցառմանը ներկա վետերաններին։ Նրանց շնորհավորեց և առողջություն մաղթեց նաև Հայաստանի պաշտպանության նախարարը։
Նրա խոսքով` բանակում ծառայությունը միշտ սուրբ պարտականություն է համարվել։
«Փետրվարի 23-ը հատուկ տեղ է զբաղեցնում ռազմական փառքի առավել նշանակալի օրերի շարքում»,- ասաց Օհանյանը։
Ինչ վերաբերում է ռուս-հայկական ռազմական համագործակցությանը, ապա նախարարի խոսքով` Հայաստանում ռուսական բազայի անձնակազմը բազմիցս հաստատել է իր բարձր մարտունակությունը։ Նա կարևորեց ռուս սահմանապահների դերն ու ընդգծեց նրանց ծանր, բայց կարևոր ծառայության ու պրոֆեսիոնալիզմի բարձր մակարդակը։
