ԵՐԵՎԱՆ, 19 փետրվարի- Sputnik. Թեև Հայաստանի բազմաթիվ բնակիչներ բողոքում են կոկորդի ցավից, և նույնիսկ լուրեր են պտտվում, թե անգինայի ախտանիշներով վիրուսի նոր տեսակ է պտտվում, այնուհանդերձ մասնագետները վստահեցնում են, որ երկրում համաճարակային իրավիճակը վերահսկելի է, և բռնկումների մասին չի կարող խոսք լինել։
«Տվյալ պահին ոչ մի համաճարակ չկա։ Եղանակը տաքացել է, մարդիկ սկսել են թեթև հագնվել, դրա հետևանքով մրսում են և հիվանդանում, այդ թվում` նաև անգինայով։ Այս դեպքում մենք գործ չունենք ինչ-որ անսովոր վիրուսի հետ»,- ասաց Հայաստանի առողջապահության նախարարության պետական հիգիենիկ և հակահամաճարակային տեսչության գլխավոր մասնագետ Լիանա Թորոսյանը։
Նրա խոսքով` այժմ լաբորատոր հետազոտություններ են անցկացվում` կապված սուր շնչառական վարակների հետ, որոնք սեզոնային բնույթ են կրում և կարող են փոխվել։
«Այդ հետազոտությունների արդյունքում նույնիսկ H1N1-ը չի առանձնանում։ Ինչ վերաբերում է սուր շնչառական վարակներին, ապա մենք լաբորատոր հաստատումներ չունենք։ Ուսումնասիրությունները շարունակվում են, որպեսզի մենք հասկանանք, թե հետագայում ինչ վիրուսների հետ ենք գործ ունենալու»,- պարզաբանեց մասնագետը։
Ի՞նչ անել չվարակվելու համար
Հագնվել եղանակին համապատասխան, հետևել սննդին, լիարժեք սնվել, քանի որ շուտով գարուն է, և օրգանիզմին անհրաժեշտ են վիտամիններ։ Երբ մարդու դիմադրողականությունը թուլանում է, ապա նա խոցելի է դառնում։
Իսկ եթե արդեն վարակվե՞լ եք
Պետք է զգոն լինել, քանի որ սուր շնչառական վարակների հարուցիչները կարող են տարածվել։ Ուստի չի կարելի ժամանակից շուտ թուլանալ։
Եթե արդեն վարակվել եք, պետք է անհապաղ դիմել բժշկի, շատ ջուր խմել, հաճախակի օդափոխել սենյակը, անընդհատ լվանալ ձեռքերը։
