ԵՐԵՎԱՆ, 19 փետրվարի- Sputnik. ԲՌԻԿՍ-ի հետ համագործակցությունը կարող է հեռանկարային լինել Հայաստանի համար, Sputnik Արմենիա պորտալին ասաց Հայաստանում Ռուսաստանի արտակարգ և լիազոր դեսպան Իվան Վոլինկինը։
«Կարծում եմ, որ կա նման հնարավորություն։ Օրինակ` 2015թ.-ի հոկտեմբերի 28-30-ը Մոսկվայում անցկացվել է ԲՌԻԿՍ-ի և ԵՏՄ-ի անդամ երկրների երիտասարդական միջազգային համաժողովը։ Հանդիպման մասնակիցները քննարկել են երիտասարդական գիտական համագործակցության, ինչպես նաև այն օրենսդրական բազայի զարգացման հեռանկարներն ու հնարավորությունները, որը կարգավորում է ԲՌԻԿՍ-ի և ԵՏՄ-ի երկրների տարածությունում մտավոր սեփականության պաշտպանությունն ու օգտագործումը։ Միջոցառման հիմնական թեմաները եղել են բժշկության, գյուղատնտեսության և ՏՏ ոլորտներում կիրառվող նորարար տեխնոլոգիաները»,- ասաց Վոլինկինը։
Նա նշեց, որ ԲՌԻԿՍ-ում ռուսական նախագահության շրջանը գործընկերների հետ համատեղ ակտիվ և հետևողական աշխատանքի փուլ է եղել` միությունն ամրապնդելու, պետությունների միջև կապերի հետագա զարգացման, գլոբալ հարաբերությունների համակարգում «հնգյակի» դիրքերն ամրապնդելու համար։ Դեսպանը նշեց, որ «այսօր արդեն կարելի է ասել, որ ռուսական նախագահությունը լուծել է իր առջև դրված խնդիրները։ Միության շրջանակում ռազմավարական գործընկերությունը հետևողականորեն խորանում է»։
Նրա խոսքով` «հնգյակը» կատարելագործում է համագործակցության այն մեխանիզմների համակարգը, որոնց նպատակն է ամրապնդել միջազգային խաղաղությունն ու անվտանգությունը, բարձրացնել համաշխարհային ֆինանսական համակարգի կայունությունն ու հուսալիությունը, զարգացնել առևտրատնտեսական և ներդրումային համագործակցությունը։ Ի հեճուկս առանձին հոռետեսական կարծիքների, դիվանագետի կարծիքով` միավորումը գործով է ապացուցել իր կարևորությունն ու կշիռը միջազգային հարցերում։
«Ռուսաստանն անցած տարի արդյունավետ աշխատանք է իրականացրել տարբեր բազմակողմ ձևաչափերում, ներառյալ` ԵՏՄ-ն, ԲՌԻԿՍ-ը և ՇՏՀ-ն։ Մենք 2015թ.-ին օգտագործել ենք Շանհայյան տնտեսական համագործակցության և ԲՌԻԿՍ-ի նախագահությունը` այդ ձևաչափերի գործունեությանը նոր խթաններ հաղորդելու համար»,- նշեց Վոլինկինը։
Ռուսաստանի դեսպանը կարևորեց նաև այն, որ Ուֆայի գագաթնաժողովի հիմնական իրադարձություններից մեկն է դարձել ԲՌԻԿՍ տնտեսական գործընկերության ռազմավարության ընդունումը, որում որոշվել են առևտրի, նորարարության և ներդրումային ոլորտների երկարաժամկետ համագործակցության ուղղությունները։
Վոլինկինի խոսքով` ռազմավարության «աճի կետերը» կօգնեն գործարկել անդամ երկրների տնտեսությունների փոխլրացման սկզբունքը, արդյունավետ օգտագործել ընդհանուր պաշարները` ապրանքային հոսքերը և կապիտալի ներդրումները զարգացնելու համար։
ԲՌԻԿՍ-ը միջպետական միավորում է, որի կազմում ընդգրված են Բրազիլիան, ՌԴ-ն, Հնդկաստանը, ՉԺՀ-ն և ՀԱՀ-ն։
