ԵՐԵՎԱՆ, 19 փետրվարի- Sputnik. Ջեյմս Բոնդի Aston Martin ավտոմեքենան, որը հայտնի է դարձել լեգենդար կինոլրտեսի մասին պատմող «007. Սպեկտր» կինոշարքի 24-րդ ֆիլմից, 3,5 մլն դոլարով վաճառվել է Christie's աճուրդի տանը կայացած էլեկտրոնային աճուրդի ժամանակ, հայտնում է ՌԻԱ Նովոստին` հղում անելով Verge-ին։
Բոնդի ավտոմեքենան վաճառվել է 2 424 500 ֆունտով (շուրջ 3,5 մլն դոլար)։ Ավելի վաղ Christie's-ը հայտարարել էր, որ ավտոմեքենայի գնահատման արժեքը շուրջ 1,5 մլն ֆունտ է կազմում։
Aston Martin DB10 ավտոմեքենան մշակել են Aston Martin-ի ինժեներները` հատուկ Բոնդի մասին ֆիլմի համար։ Ֆիլմերի համար ստեղծված մեքենաների մեծ մասը ստեղծվել է նկարահանումների համար, իսկ նմուշներից երկուսը` բացառապես ցուցադրության համար։ Այդ ցուցանմուշներից մեկն էլ վաճառվել է աճուրդում։
Ավտոմեքենան ունի V8 շարժիչ 4,7 լիտր ծավալ, մինչև 305 կմ/ժ արագություն։ Սակայն նոր տերը չի կարող վարել այն սովորական ճանապարհներով, քանի որ մեքենան համապատասխան հավաստագիր չի ստացել։
Աճուրդից ստացված ողջ հասույթը կտրամադրվի բարեգործական և հասարակական կազմակերպություններին, ներառյալ «Բժիշկներ առանց սահմանների» կազմակերպությանը։
