ԵՐԵՎԱՆ, 19 փետրվարի — Sputnik, Անի Լիպարիտյան. Վարժարանի 15-ամյա սան Գեորգին Sputnik Արմենիային պատմեց, որ ինքն ու իր համակուրսեցիները հաճույքով են մի քանի լեզու ուսումնասիրում` ռուսերեն, անգլերեն, իտալերեն, ֆրանսերեն, գերմաներեն ու հունարեն։
«Ես անգլերեն եմ ուսումնասիրում, սակայն մեզնից յուրաքանչյուրն ըստ ցանկության կարող է 2-3 լեզու սովորել։ Եթե դու կոնկրետ երկրի լեզվին լավ ես տիրապետում, ապա ուսումդ այնտեղ շարունակելու հնարավորություն ունես», — ասաց Գեորգին։
Նա ավելացրեց, որ օտար լեզվի դասերը հետաքրքիր են ու բովանդակալից ։
«Ուրախ եմ, որ սովորում եմ այստեղ։ Ես այստեղ եմ ընդունվել, որպեսզի շարունակեմ մեր ընտանիքի գործը, քանի որ ես տոհմիկ զինվորականների ընտանիքից եմ։ Իմ պապը գնդապետ էր», — ավելացրեց կադետը։
Գիրք նվիրելու օրը
Մոնթե Մելքոնյանի անվան ռազմամարզական վարժարանի սաները փետրվարի 19-ին` գիրք նվիրելու օրը, ռուսաց լեզվի դասագրքեր ստացան գիտության և մշակույթի Ռուսական կենտրոնից (ԳՄՌԿ)։
Ռուսական դասագրքերի փաթեթների հանդիսավոր հանձնման արարողությունը անցկացվեց վարժարանի գրադարանում։ Միջոցառմանը մասնակցեցին Հայաստանում Ռուսաստանի դեսպանատան ռազմական կցորդները, ԳՄՌԿ ներկայացուցիչներն ու այլ պաշտոնատար անձինք։
Երևանում ԳՄՌԿ տնօրենի տեղակալ Ացամազ Բիչենովը նշեց, որ այսօր` գրող և բանաստեղծ Հովհաննես Թումանյանի ծննդյան և Գիրք նվիրելու օրը, կադետները ռուսաց լեզվի դասագրքեր ու ուսումնամեթոդական գրականություն են ստանում վարժարանի գրադարանը համալրելու համար։
«Ընդհանուր առմամբ` 210 անուն գիրք։ Առաջին հերթին շնորհակալություն եմ հայտնում վարժարանի ղեկավարությանը ռուսաց լեզվի նկատմամբ ցուցաբերած վերաբերմունքի համար, և այն ըմբռնման համար, որ այսօր ռուսաց լեզվի ուսուցումը, ինչպես երբևէ, արդիական է Հայաստանի ու ընդհանուր առմամբ տարածաշրջանի համար», — նշեց Բիչենովը։
Նա ավելացրեց, որ անցյալ տարի ռուսաց լեզվի զարգացման դաշնային ծրագրի շրջանակում 2 մլն ռուբլի արժողությամբ դասագիրք է բաժանվել։ Բիչենովը հուսով է, որ այս տարի ծավալները կպահպանվեն։
Մոնթե Մելքոնյանի անվան ռազմամարզական վարժարանի ղեկավար, գնդապետ Վիտալի Ոսկանյանն իր հերթին շնորհակալություն հայտնեց Ռուսաստանի դեսպանատանն ու ԳՄՌԿ-ին ռուսաց լեզվի ուսումնասիրման գործում աջակցություն ցուցաբերելու համար։
«Հաշվի առնելով այն, որ ռուսաց լեզուն հայերենից հետո մեզ համար հիմնական լեզուներից մեկն է, և մեր սաների ու շրջանավարտների շուրջ 60 տոկոսն ընդունվում է ՌԴ-ի ռազմաուսումնական հաստատություններ` հուսով ենք, որ մեր համագործակցությունն արդյունավետ կլինի և շարունակական բնույթ կկրի արդեն այլ կրթական ոլորտներում», — ասաց Ոսկանյանը։
Գիրք նվիրելու օրն անցկացնելու նախաձեռնությունն առաջացել է 2008 թվականին, գաղափարի հեղինակն է Հայաստանի գրողների միության նախկին նախագահ Լևոն Անանյանը։ Առաջարկը հավանության է արժանացել Հայաստանի կառավարության կողմից։
Գիրք նվիրելու օրը` փետրվարի 19-ը, պատահաբար չի ընտրվել, այդ օրն է ծնվել մեծանուն գրող և բանաստեղծ Հովհաննես Թումանյանը։
