ԵՐԵՎԱՆ, 18 փետրվարի — Sputnik. Աշուն-գարուն հավաքածուի զգեստները, վերարկուները, կոշիկները, պայուսակներն ու աքսեսուարները զարդարված են հայկական գորգերի գունեղ նախշերով։
Տերյան մշակութային կենտրոնի փորձագետները, դիզայներներն ու հեղինակները հագուստին վերաբերում են որպես դեկորատիվ-կիրառական արվեստի, որի միջոցով ցանկանում են էթնիկ թեման զարգացնել ու տարածել մարդկանց մեջ։
«Գորգերի բոլոր տարրերն ընտրված են ինտուիտիվ կերպով, նայեցինք ու այն, ինչ մեզ դուր եկավ, օգտագործեցինք երիտասարդների համար նախատեսված ժամանակակից հագուստներ ստեղծելիս։ Մենք օգտագործել ենք նույնիսկ 21-րդ դարի տեքստիլը», — նշեց նախաձեռնության հեղինակ Լիլիթ Մելիքյանը։
Սա Տերյան կենտրոնի ներկայացուցիչների առաջին փորձն էր, ու նրանք հուսով են, որ այն դուր կգա մարդկանց։ Ցուցահանդեսը ստեղծվել է մարդկանց մեծ խմբի, մասնավորապես երիտասարդության շահերը հաշվի առնելով, հետևաբար նաև գներն են մատչելի նրանց համար. դրանք տատանվում են 5000-50000 դրամի սահմաններում։
«Նոր հավաքածուի մեջ օգտագործվել են «Վիշապագորգի» և հայկական գորգերի այլ տեսակների զարդանախշերը», — հայտնեց գորգերի փորձագետ Նաիրա Մխիթարյանը։
Ինչպես Sputnik Արմենիայի թղթակցի հետ զրույցում նշեց Մելիքյանը, ապրիլին երևանցիները կկարողանան կրել նաև խաչքարերի զարդանախշերով տունիկաներ։
Կենտրոնի գործունեությունն ուղղված է անցյալի ուսումնասիրմանն ու ժամանակակից կյանքում դրա կիրառմանը։ Տերյան կենտրոնը վերջին երկու տարիներին հայկական համայնքների աջակցությամբ այցելել է 12 երկիր, որտեղ ցուցադրել է իր արտադրանքը։
Մոտ ապագայում նրանք մտադիր են գորգերի զարդանախշերով ջինսեր արտադրել։ Այդ նախշերը նրանք մտադիր են «տեղափոխել» նաև արծաթյա զարդերի վրա։
