Անկարայի կենտրոնում խոշոր ահաբեկչություն է տեղի ունեցել. խորհրդարանի, գլխավոր շտաբի և զինվորական հանրակացարանի շենքերից ոչ հեռու` մարդաշատ խաչմերուկում, ականապատ ավտոմեքենա է պայթել։ Դիտեք կադրեր դեպքի վայրից
Անկարայի կենտրոնում ականապատ ավտոմեքենայի պայթյունի հետևանքով մահացել է առնվազն 28 մարդ, վիրավորվել՝ 61-ը։ Ահաբեկչության զոհերի մեծ մասը զինծառայողներ են, բայց տուժել են նաև խաղաղ բնակիչներ, որոնք գտնվել են դեպքի վայրում։
Ականապատ ավտոմեքենան պայթել է փետրվարի 17-ին ժամը 18։31-ին։ Թուրքիայի գլխավոր շտաբի հաղորդագրության համաձայն, պայթյունը տեղի է ունեցել այն պահին, երբ ռազմական անձնակազմ տեղափոխող մեքենաների շարասյունը կանգնել է լուսացույցի կարմիր լույսի տակ։
Հզոր պայթյունի ձայնը լսվել է Թուրքիայի մայրաքաղաքի շատ շրջաններում։ Դրանից անմիջապես հետո դեպքի վայրը պատվել է խիտ ծխի ամպերով, որը կարելի էր տեսնել Անկարայի շատ շրջաններից։
Սա վերջին ամիսների ընթացքում Թուրքիայում տեղի ունեցած չորրորդ խոշոր ահաբեկչական գործողությունն է: Ահաբեկչություն էր տեղի ունեցել անցած տարվա հուլիսին Սիրիայի հետ սահմանին գտնվող Սուրուչում, հոկտեմբերին՝ Անկարայում, այս տարվա հունվարին՝ Ստամբուլում, ընդհանուր առմամբ մահացել է 150 մարդ։ Բացի այդ, վերջին ամիսներին ռազմական տրանսպորտի պայթյունի և Քրդստանի աշխատանքային կուսակցության գրոհայինների հարձակումների հետևանքով սպանվել է ավելի քան 200 թուրք զինվորական ու ոստիկան։
