ԵՐԵՎԱՆ, 18 փետրվարի-Sputnik. Էներգետիկայի և բնական պաշարների նախարար Երվանդ Զախարյանն առաջարկում է «Հայկական ատոմային էլեկտրակայան» և «Երևանի ջրաէլեկտրակայան» ընկերություններին տրամադրել երկարաժամկետ և ցածր տոկոսներով վարկեր։
«Ընկերությունները կուտակել են պարտքեր, որոնք պայմանավորված են Հայաստանի էլեկտրական ցանցերի կողմից ստացված էլեկտրաէներգիայի դիմաց չվճարումներով, ինչպես նաև «Նաիրիտ» գործարանին և «Վանաձոր-քիմպրոմ»-ին տրամադրված փոխառություններով»,- ասաց նախարարը։
Վարկը տրամադրվում է 30 տարի ժամկետով։ Առաջին 14 տարին արտոնյալ ժամկետ է` 1.5 տոկոս վճարով։ Հաշվի առնելով վարկային պայմանները` Երվանդ Զախարյանն ամբողջ պատասխանատվությամբ հայտարարեց, որ սակագների վրա որևէ ազդեցություն չի լինի։
Ի պատասխան, Հովիկ Աբրահամյանն ասաց, որ արդեն տարուց ավելի է, ինչ իրենք քննարկում և ուսումնասիրում են էներգետիկ ոլորտի խնդիրները։ Վարչապետն արդեն գծագրված պատկեր է տեսնում։
«Հիմա ուզում ենք առողջացնել համակարգը և շատ խստորեն հետևել, որ լրացուցիչ պարտքեր չկուտակվեն։ Վարկային պայմանները շատ լավն են, բայց ամեն դեպքում մենք վարկ ենք վերցնում նախկինում կուտակված խնդիրները լուծելու համար»,-ասաց Հովիկ Աբրահամյանը։
