ԵՐԵՎԱՆ, 17 փետրվարի — Sputnik. Ոստիկանության Մալաթիայի բաժնի աշխատակիցները, իրացնելով ստացված օպերատիվ տվյալները, համագործակցելով ոստիկանության Երևան քաղաքի վարչության քրեական հետախուզության բաժնի և իրենց բաժնի անչափահասների գործերով բաժանմունքի ծառայողների հետ, փետրվարի 10-ին, երեկոյան 22։ 00-ին պոռնկությամբ զբաղվելու կասկածանքով մերսման սրահից բերման են ենթարկել մերսող ձևակերպված 27-ամյա և 23-ամյա երկու կնոջ։
Նրանցից վերցված բացատրություններից պարզվել է, որ մերսման սրահի տնօրեն 25-ամյա Սահակ Դավթյանը նպաստել է սրահում պոռնկությամբ զբաղվելուն։ Հունվարի 29-ին ոստիկանության բաժնում հաղորդում են տվել երկու կանայք։ Նրանք հայտնել են, որ սեպտեմբեր և դեկտեմբեր ամիսներից որպես «մերսուհի» աշխատանքի են ընդունվել մերսման սրահում, որտեղ սրահի պատասխանատուն` ոմն Ռաֆոն, սրահի տնօրենն ու նրա եղբայրը, համոզել ու դրդել են, որպեսզի կանայք, մերսումից բացի, հաճախորդներին մատուցեն նաև սեռական բնույթի ծառայություններ։
