ԵՐԵՎԱՆ, 16 փետրվարի — Sputnik. Եվրոպական երկրները եկել են այն մտքին, որ ավելի լավ է փախստականների կեցության համար վճարեն մյուս երկրներին, քան սեփական տարածք նրանց ընդունեն, Sputnik Արմենիա պորտալին ասաց անկախ տնտեսագետ Վիլեն Խաչատրյանը։
Sputnik.Կարծիք հարցման տվյալներով` Քյոլնի իրադարձություններից մեկ ամիս անց գերմանացիների թիվը, որոնք կարծում են, որ կառավարությունը պետք է թույլատրի փախստականների մուտքը երկիր, նվազել է 7 տոկոսով (58-ից 51)։
Հարցման արդյունքները մեկնաբանելով` Խաչատրյանը նշեց, որ հաշվի առնելով այն հանգամանքը, որ Եվրոպայում 2015 թվականի ընթացքում փախստականների թիվն աճ է ավելի քան 1,2 մլն-ով, Գերմանիայում նրանց ընդունելու կողմնակիցների քանակի նվազումը օբյեկտիվ պատճառներ ունի։
«Գերմանիայի տնտեսության վիճակի վերջին վատթարացման, մասնավորապես արդյունաբերական արտադրանքի անկման ու Deutsche bank-ում առկա խնդիրների ֆոնին երկրի բնակչության շրջանում աճում է այն մարդկանց թիվը, ովքեր դժգոհում են միգրանտների սոցիալ-տնտեսական խնդիրներն իրենց բարեկեցության հաշվին լուծելու փորձերից», — ասաց Խաչատրյանը։
Բացի այդ, նրա խոսքով, որպես երկրորդ պատճառ կարելի է դիտարկել այն, ինչ տեղի ունեցավ Քյոլնում ու Դրեզդենում։
«Փախստականներն իրենց չեն պահում այնպես, ինչպես հարկն է։ Եվ սա գերմանացիների պատասխան ռեակցիան է առաջացնում, ինչը դրսևորվում է զանգվածային ցույցերի տեսքով։ Կարելի է ասել, որ բազմամշակութայնության քաղաքականությունը որոշակի առումով փակուղի է մտել», — ընդգծում է փորձագետը։
Այդ դժգոհությունները բերում են նրան, որ միգրանտների հարցն իշխանությունների օրակարգ է մտնում, ու խոսվում է սահմաններն ուժեղացնելու մասին։
Նրա խոսքով` Գերմանիան, ամենայն հավանականությամբ, կարող է ուժեղացնել սահմանը` ծախսելով դրա վրա շուրջ 10 մլրդ դոլար։ Նույն նպատակի համար, սակայն արդեն ամբողջ Եվրոպայի շրջանակներում, ենթադրվում է մոտ 100 մլրդ հատկացնել։
«Եվրոպայում գիտակցել են, որ ճիշտ կլինի ֆինանսավորել այն երկրներին, որոնք կզբաղվեն միգրանտներով։ Այն գումարները, որոնք պետք է ծախսեին փախստականների կեցության համար իրենց երկրներում, նրանք պատրաստ են փոխանցել, օրինակ, Թուրքիային (ինչպես արդեն ավելի վաղ փոխանցվել է 3 մլրդ եվրո)», — ասում է փորձագետը։
Մյուս կողմից, նրա կարծիքով, դրանից կարող էր օգտվել նաև Հայաստանը Սիրիայից փախստականների հարցում։ Հայաստանը կարող էր գումար խնդրել սիրիահայերին պահելու ու նրանց Եվրոպա չուղարկելու համար։
