ԵՐԵՎԱՆ, 16 փետրվարի- Sputnik. Գերմանիայի Մարբուրգ քաղաքում բացվել է անվանի մրցարշավորդ, «Ֆորմուլա 1»-ի յոթակի չեմպիոն Միխայել Շումախերի կարիերային նվիրված ցուցահանդեսը, հաղորդում է ՌԻԱ Նովոստին` հղում անելով SBS-ին։
«Իհարկե, հատկապես նման օրերին շատ ենք զգում Միխայելի կարիքը։ Ցավոք, մենք չենք կարող փոխել այն, ինչ եղել է։ Մենք միայն կարող ենք հուսալ, որ նա օրերից մի օր կրկին մեզ հետ կլինի»,- ցուցահանդեսի բացման ժամանակ ասել է Շումախերի մենեջեր Սաբինա Կեմը։
Ցուցահանդեսի բացմանը շուրջ 200 հյուր է ներկա եղել, այդ թվում` Շումախերի կինը` Կորինան, և սպորտսմենի երեխաները։
Շումախերը 2013թ.-ի դեկտեմբերի վերջին ֆրանսիական Մերիբել քաղաքում լեռնային դահուկներով սահելիս ընկել էր։ Նա գանգուղեղային վնասվածք էր ստացել` գլխուղեղի երկու կիսագնդի բազմաթիվ վնասվածքներով և արյան զեղումով։ 2014թ.-ի սեպտեմբերից բուժվում է Շվեյցարիայում` Ժնևյան լճի ափին գտնվող իր առանձնատանը, մարզիկի առողջական վիճակի մասին տեղեկությունները շատ սուղ են։
