ԵՐԵՎԱՆ, 15 փետրվարի —Sputnik. Ստամբուլում ոստիկանությունն արցունքաբեր գազ է կիրառել քրդամետ ցուցարարների դեմ։ Որոշ ցուցարարներ վնասվածքներ են ստացել ոստիկանների և Քրդական աշխատավորական կուսակցության դեմ Անկարայի կողմից իրականացվող ռազմական գործողության հակառակորդների միջև բախումների ընթացքում: Այս պահին Ստամբուլում ոստիկանական ճնշումները, խուզարկումները շարունակվում են։ Փողոցներում մարդիկ, ցուցարարներ չկան, քանի որ չեն հանդգնում բախումներ սկսել ոստիկանության հետ,- ասաց Բագրատ Էստուկյանը։
Թուրքիայի քրդաբնակ տարածքներում մեկ ամսից ավելի է` բավական լարված իրավիճակ է։ Էստուկյանի խոսքով՝ այդ լարվածությունը վերջին շաբաթներին վերածվել է ռազմական առճակատման, հատկապես քրդաբնակ արևելյան քաղաքներում բախումներ են տեղի ունեցել Քրդական աշխատավորական կուսակցության զինյալների ու թուրքական զինված ուժերի միջև:
«Թուրքիայի ներքին գործերի նախարարությունը հայտարարել է, որ ձերբակալություններն ու զինված գործողություններն ավարտված են, սակայն իրականում այդ տարածքները դեռ շրջափակման մեջ են. երկրի մեծ քաղաքներում հետզհետե ավելի է սրվում քրդերի դեմ վերաբերմունքը»,- ասել է Էստուկյանը:
Ըստ նրա` քրդական ժողովրդական կուսակցության մասնաճյուղերի դեմ երեկ հատուկ ոստիկանական հետապնդումներ են սկսվել, ու դրանք դեռ շարունակվում են։ Կարելի է ասել, որ բավական սրված իրավիճակ է տիրում քրդական քաղաքականության դեմ։
«Բացի այդ, վերջին երկու օրում Թուրքիան ընդյալնել է ռազմական գործողությունների աշխարհագրությունը: Թուրքական օդուժը սկսել է ռմբակոծել Սիրիայի քրդաբնակ տարածքները։ Մտավախություն կա, որ իրավիճակը ավելի կսրվի ու վերահսկողությունից դուրս գալով կվերածվի լայնածավալ ռազմական գործողությունների»,- ասաց Էստուկյանը։
