ԵՐԵՎԱՆ, 15 փետրվարի — Sputnik. Կամերային երաժշտական թատրոնի գլխավոր ռեժիսոր Արմեն Մելիքսեթյանը բազմաթիվ անգամ հայտարարել է, որ ինքը թատրոնից չի հեռանա և դա իր համար սկզբունքային հարց է։ Փետրվարի 12-ին Արմեն Մելիքսեթյանին ազատել են աշխատանքից։ Կամերային երաժշտական թատրոնի մամուլի և հասարակայնության հետ կապերի պատասխանատու Նարա Եփրեմյանը Sputnik-ի հետ զրույցում հաստատեց այս տեղեկությունը։
«Պետական կամերային երաժշտական թատրոնի տնօրեն Վարդան Գրիգորյանի 2016 թվականի փետրվարի 12-ի հրամանով աշխատանքից ազատվել է նույն թատրոնի գլխավոր ռեժիսոր Արմեն Մելիքսեթյանը և լուծվել է 2015 թվականի փետրվարի 2-ին նրա և թատրոնի միջև կնքված աշխատանքային պայմանագիրը: Գլխավոր ռեժիսորին զբաղեցրած պաշտոնից ազատելու հիմքերն ու պատճառները տարբեր են, այդ թվում՝ պարբերաբար առանց հարգելի պատճառի աշխատանքի չներկայանալը, իրեն վերապահված պարտականությունները պարբերաբար չկատարելը, տնօրենի հանձնարարականներն ու հրամանները չկատարելը, կամայականություն դրսևորելը, իր մասնագիտական և աշխատանքային պարտականություններից բխող հաշվետվություններ չներկայացնելը և այլն»,-տեղեկացրեց թատրոնի մամուլի և հասարակայնության հետ կապերի պատասխանատուն:
Ավելի վաղ ԶԼՄ-ներում տեղեկություն էր տարածվել, թե Կամերային երաժշտական թատրոնի գլխավոր ռեժիսոր Արմեն Մելիքսեթյանը բաց նամակ է գրել մշակույթի նախարար Հասմիկ Պողոսյանին և խնդրել ժամանակավորապես դադարեցնել Կամերային երաժշտական թատրոնի գործունեությունը։
