Ռուսաստանի վարչապետ Դմիտրի Մեդվեդևը Euronews հեռուստաընկերությանը տված հարցազրույցում պատասխանել է մի շարք հարցերի, որոնց թվում հարցեր են հնչել` Սիրիայի իրավիճակի կարգավորման խնդիրների, ուկրաինական ճգնաժամի և Ղրիմի կարգավիճակի վերաբերյալ։
ՌԴ կառավարության ղեկավար Դմիտրի Մեդվեդևը հարցազրույցի ժամանակ հայտարարել է, որ զգուշավոր լավատեսություն է ցուցաբերում Սիրիայում իրավիճակի կարգավորման շրջանակում համագործակցություն հաստատելու հարցում։
«Ես զգուշավոր լավատեսությամբ զգում եմ, որ այդ հարցում կհաջողվի համագործակցություն հաստատել, ինչը չափազանց անհրաժեշտ է, որովհետև եթե մենք չմիավորվենք այդ հարցում, ապա Սիրիայում անվերջ պատերազմ կլինի, մարդիկ կշարունակեն զոհվել, Եվրոպան կողողվի նոր փախստականներով, Եվրոպան ստիպված կլինի լուծել իր չափազանց բարդ խնդիրները, և ամենագլխավորը` մենք չենք կարող հաղթել ահաբեկչությանը, որը ժամանակակից քաղաքակրթության գլխավոր սպառնալիքն է»,- ասել է ՌԴ վարչապետը։
2011 թվականի մարտից Սիրիայում զինված հակամարտություն է ընթանում, որի հետևանքով, ըստ ՄԱԿ-ի տվյալների, ավելի քան 250 հազար մարդ է զոհվել։ Կառավարական զորքերը դիմակայում են տարբեր զինված կազմավորումներին պատկանող գրոհայինների ջոկատներին։ Առավել ակտիվ են «Իսլամական պետություն» և «Ջեբհաթ ան Նուսրա» ծայրահեղական խմբավորումները։
Հարցազրույցի ընթացքում Մեդվեդևը պատասխանել է միջազգային հարաբերությունների մասին մի շարք այլ հարցերի։ Խոսելով Ղրիմի մասին` նա հայտարարել է, որ թերակղզու կարգավիճակի մասին հարց գոյություն չունի։
«Այդ հարցը մեկընդմիշտ փակ է։ Ղրիմը ռուսական տարածքի մաս է։ Այնտեղ հանրաքվե է անցկացվել, մենք փոխել ենք մեր սահմանադրությունը։ Ղրիմի Հանրապետությունը և Սևաստոպոլ քաղաքը Ռուսաստանի մասն են կազմում»,- ասել է Մեդվեդևը։
Ղրիմը կրկին Ռուսաստանի մաս է դարձել 2014թ.-ի մարտին անցկացված հանրաքվեից հետո. բնակչության մեծ մասը քվեարկել էր ՌԴ կազմի մեջ մտնելու օգտին։ Ուկրաինան առաջվա պես համարում է, որ Ղրիմը պատկանում է իրեն, բայց ժամանակավորապես բռնազավթված է։ ՌԴ ԱԳՆ-ն բազմիցս հայտարարել է, որ Ղրիմի բնակիչները ժողովրդավարական ճանապարհով, միջազգային իրավունքին և ՄԱԿ կանոնադրությանը համապատասխան քվեարկել են Ռուսաստանի հետ վերամիավորվելու օգտին, որը հարգում ու ընդունում է այդ ընտրությունը, այդ որոշումը իրականություն է և դրա հետ պետք է հաշվի նստել։
