ԵՐԵՎԱՆ, 15 փետրվարի — Sputnik. Վրաստանի փոխվարչապետ, էներգետիկայի նախարար Կախա Կալաձեն պաշտոնական այցով Իրան է մեկնել Վրաստան իրանական գազի ներկրման հնարավորության հարցը քննարկելու համար, հայտնում է Վրաստանի Էներգետիկայի նախարարությունը։
«Վրացական ու իրանական կողմերը ներկա փուլում ուսումնասիրում են Վրաստան իրանական գազի ներմուծման հնարավորությունը։ Ուսումնասիրվելու են նաև տարբեր կարևորագույն էներգետիկ ներդրումային նախագծերի իրականացման հարցեր», — գրված է հայտարարության մեջ։
Ավելի վաղ Կալաձեն հայտնել էր, որ Թեհրան նախատեսված այցի ժամանակ նա էներգետիկայի նախարարի, արտգործնախարարի և երկրի փոխնախագահի հետ հանդիպումներ կանցկացնի։ Նրա խոսքով` Իրանից գազի մատակարարումը կարող է իրականացվել երկու ճանապարհով` Հայաստանի կամ Ադրբեջանի տարածքով։
Վրաստան գազը հիմնականում ներկրվում է Ադրբեջանից, սակայն Ռուսաստանից Վրաստանը ստանում է Հայաստան մատակարարվող գազի ամբողջ ծավալի 12 տոկոսը` որպես վճար տարանցման համար։ Ռուսական գազ երկիրը չի գնում 2007 թվականից։
Երկրում բնական գազի դեֆիցիտի պատճառով Վրաստանը սկսել է բանակցել ռուսական «Գազպրոմ» ու ադրբեջանական SOCAR ընկերությունների հետ` նպատակ ունենալով գազի լրացուցիչ ծավալներ ստանալ։ Իրանն ուսումնասիրվում է որպես գազի մատակարարման ևս մեկ տարբերակ։
