Լաուրա Սարգսյան, Sputnik
Որոշ երեխաներ, ծնողներին ամուր գրկած, վախվորած շուրջբոլորն են նայում, ոմանք մազերն են ուղղում՝ պատրաստվելով զվարճալի գործին` կեցվածք ընդունելուն:
«Ես 7 տարեկան եմ և սիրում եմ, երբ ինձ լուսանկարում են: Երբ մեծանամ, դերասանուհի եմ դառնալու»,- ասում է Աննան, ով լուսանկարչական ստուդիայում արդեն երկրորդ անգամ է: Փորձառու աղջիկը խորհուրդներ է տալիս 5-ամյա Արթուրին, ով չի ուզում լուսանկարվել: Աղջիկը նրան բացատրում է, որ լուսանկարվելը զվարճալի զբաղմունք է:
«Երբ երեխան կտրականապես հրաժարվում է լուսանկարվել, մենք չենք լուսանկարում, քանի որ երեխային հարկադրաբար լուսանկարելը կարող է սթրեսի պատճառ դառնալ»,- Sputnik Արմենիային պատմեց «Իմ բալիկը» մանկական ֆոտոստուդիայի և ամսագրի տնօրեն Հայկ Գևորգյանը:
Ֆոտոստուդիան և ամսագիրը, որի էջերում ծնողները կարող են կարդալ տարբեր խորհուրդներ հոգեբաններից, փորձագետներից, հետաքրքիր պատմություններ երեխաների մասին, գործում են արդեն մի քանի տարի: Ֆոտոստուդիայում արդեն ավելի քան 30 000 ֆոտոսեսիա է իրականացվել:
«Ամեն անգամ նորովի ես մոտենում խնդրին: Երեխաների հետ աշխատելը զարմանալի և գրավիչ զբաղմունք է: Լուսանկարիչը պետք է մտնի փոքրիկի ներաշխարհը, կարողանա շահել նրա վստահությունը:»,- ասաց Գևորգյանը:
Մանկական նկարահանման մեջ կարևոր է նաև, որպեսզի երեխան իրեն անկաշկանդ պահի: Հայկի խոսքով՝ երեխաները մի քանի կարգի են բաժանվում:
Ավելի հեշտ է աշխատել այն երեխաների հետ, որոնք դեռ մեկ տարեկան չկան: Նրանք չեն գիտակցում, թե ինչ է կատարվում:
Մեկից երեք տարեկան երեխաներն ամենաշարժունն են: Այդ տարիքի երեխայի հետ ընդհանուր լեզու գտնելը և նրա ուշադրությունը լուսանկարչական խցիկին ուղղելը դժվար է: Այդ տարիքում երեխան չի ցանկանում կանգնել մի տեղում, անընդհատ շարժման մեջ է: Նվազագույն կողմնակի շարժումը կարող է շեղել նրա ուշադրությունը:
Հինգ տարեկանից բարձր երեխաները գիտակցում են, թե ինչ է ֆոտոշարքը և հեշտությամբ ու հաճույքով կեցվածք են ընդունում, լինում է, որ պարզապես չեն ցանկանում լուսանկարվել:
«Երեխաների հետ լուսանկարչական ստուդիայում կարելի է ամենաանհավանական ստեղծագործական գաղափարներ իրագործել: Հայերը սիրում են ռազմական թեման և հայկական տարազը»,- պատմեց Հայկը:
Մինչ մենք զրուցում էինք Հայկի հետ, ստուդիայից դուրս եկան փոքրիկ հերոսները, որոնք եկել էին իրենց կամքով, կամ ծնողներն էին ստիպել:
Ծնողների և երեխաների հետ շփման տարիների ընթացքում Հայկին մինչև հիմա զարմացնում է, որ ծնողների մեծամասնությունն իրենց փոքրիկների լուսանկարներն ընտրելիս նախընտրում է նրանք, որոնք ֆոկուսից դուրս են:
«Ես սիրում եմ իմ աշխատանքը և ուր էլ գնամ, որտեղ էլ լինեմ, ամեն տեղ կզբաղվեմ փոքրիկ հերոսներին լուսանկարելով»,- նշեց Հայկը:
Նա անջատեց լուսանկարչական ստուդիայի լույսը և դուրս եկավ շենքից, որպեսզի վաղը կրկին զբաղվի իր գործով:
