Անի Լիպարիտյան, Sputnik
Հայ գործարար Գեորգի Դեոդատն առաջին սրճարանը Չեխիայում բացեց 18-րդ դարում, իսկ այսօր Գևորգ Ավետիսյանը եվրոպացի հրուշակագործներին հայկական հրուշակեղեն է առաջարկում:
Գևորգը Հայաստանից մեկնել է 90-ականներին և մշտական բնակություն հաստատել Չեխիայում:
Այսօր նրա զարմիկը` գործարար Միքայել Սիմոնյանը, արտադրանքն արժանի կերպով ներկայացնում է Չեխիայի սահմաններից դուրս:
Նա չեխական պատվիրակության կազմում Երևան է ժամանել` մասնակցելու հայ-չեխական համաժողովին և արտադրանքը տեղի շուկային ու գործարարներին ներկայացնելու: Այն, որ հայը գտնվում է չեխական, այլ ոչ թե հայկական պատվիրակության կազմում, արդեն իսկ զարմանալի է:
«Ես վերջին 14 տարվա ընթացքում առաջին անգամ եմ Հայաստանում: Մենք տեղափոխվել ենք Չեխիա, ու երբևէ հնարավորություն չի եղել վերադառնալ Հայրենիք: Իմ քեռին, ում ես կարող եմ հայր անվանել, Չեխիայի ամենախոշոր գործարարներից է», — Sputnik Արմենիային հպարտությամբ պատմեց Միքայելը, ով անմիջական կապ ունի ընտանեկան բիզնեսի հետ:
Գործարարի զարմիկը պատմեց, որ Գևորգը սկզբում իրեն շատ միայնակ էր զգում օտար երկրում, դժվար էր առանց հարազատների ու մտերիմների: Եվ նա որոշեց, քրոջը կանչել իր մոտ, և քույրն իր երեխաներով տեղափոխվեց Չեխիա:
Երբ Ավետիսյանը հաստատվեց Չեխիայի փոքրիկ քաղաքներից մեկում, այնտեղ ոչ մի հայ չկար: Նա դժվարությամբ հարմարվեց ու ինտեգրվեց, սակայն համառությունը, խելքն ու աշխատասիրությունն արեցին իրենց գործը:
Սկզբում Գևորգի քույրը հրուշակեղենը պատրաստում էր տանը, իսկ եղբայրն այն բաժանում էր տարբեր առևտրի կետերում: Գործերն առաջ գնացին, և ինչպես պատմում է Միքայելը, ձեռքի աշխատանքին շուտով փոխարինեց ժամանակակից տեխնիկան:
«Յուրաքանչյուր փոքրիկ չեխ գիտի, թե ինչ է Ավետիսյանների քաղցրավենիքը, քանի որ մենք պատրաստում ենք հիմնականում հայկական անուշեղեն, որը հետագայում սկսեցին տանել բոլոր եվրոպական երկրներ», — ասաց Սիմոնյանը:
Հայաստանում չեխական կապիտալով գործող 20 ընկերություն է ներկայացված: Եվ գուցե շուտով հայտնվի նաև չեխ-հայկական ընկերություն. հավանաբար Գևորգն ու իր ընտանիքը կցանկանան ոչ միայն իրենց հաջողություններով ուրախացնել հայրենակիցներին, այլև հրուշակեղենով:
