ԵՐԵՎԱՆ, 13 փետրվարի — Sputnik. Դահուկորդ Միքայել Միքայելյանը 1500 մետր ազատ ոճում հաղթահարեց որակավորման փուլի արգելքը, հայտնում է ՀԱՕԿ լրատվության բաժինը:
Հաղորդման համաձայն` Պատանեկան ձմեռային երկրորդ օլիմպիական խաղերում Հայաստանի ներկայացուցիչ Միքայել Միքայելյանը 1500 մետր ազատ ոճում հաղթահարեց որակավորման փուլի արգելքը` 50 մասնակցի մեջ զբաղեցնելով 27-րդ հորիզոնականը:
Միքայելյանը տարածությունը հաղթահարեց 17 րոպե 3 վայրկյանում:
Միքայելյանը 30 լավագույնների շարքում կպայքարի եզրափակիչ փուլի ուղեգրի համար, որտեղ իրենց ուժերը կչափեն 10 լավագույնները:
Նշենք, որ Ձմեռային պատանեկան երկրորդ օլիմպիական խաղերի պաշտոնական մեկնարկը տրվեց փետրվարի 13-ին Նորվեգիայի Լիլեհամեր քաղաքի կենտրոնական մարզադաշտում՝ արքայադուստր Ինգրիդ Ալեքսանդրայի մասնակցությամբ:
Բացման պաշտոնական արարողությունը կայացավ Լիլեհամերի «Լյուսհորսբաքեն» մարզադաշտում, որտեղ կայացել էր նաև 1994 թվականի Ձմեռային օլիմպիական խաղերի բացումը: Լիլեհամերում այս օրերին ցուրտ է, բայց արարողությանը թիմերը ներկայացել էին մեծաքանակ պատվիրակությամբ:
Մինչ կսկսվեր բացման արարողության հիմնական մասը, Միջազգային օլիմպիական կոմիտեի նախագահ Թոմաս Բախը շնորհավորեց բոլոր մարզիկներին. «Սիրելի մարզիկներ, բարով եք եկել ձեր խաղերին: Հաջորդ 10 օրերն անկրկնելի կլինեն ձեզ համար: Այս խաղերը ցույց կտան ձեր սերը դեպի սպորտը: Այս խաղերը կլինեն ուսուցողական, սովորեցնող, բայց որ ամենակարևորն է` նոր ընկերներ գտնելու խաղեր»:
Օլիմպիական խաղերի դրոշը մարզադաշտ բերելու պատիվը տրված էր մի քանի մարզիկների, ովքեր օլիմպիական տարբեր խաղերի մրցանակակիրներ են: Մարզիկների, մարզիչների և մրցավարների անունից օլիմպիական երդում տվեցին նորվեգացիները:
Ձմեռային խաղերի կրակը վառեց Նորվեգիայի արքայադուստր Ինգրիդ Ալեքսանդրան:
Ձմեռային խաղերի կարգախոսն է՝ «Դուրս արի սահմաններից, ստեղծիր ապագան»:
