ԵՐԵՎԱՆ, 13 փետրվարի — Sputnik. Մոսկվայի և Համայն Ռուսիո պատրիարք Կիրիլը և Հռոմի պապ Ֆրանցիսկոսը հանդիպել են Կուբայում։
Հավանայի օդանավակայանում հանդիպումը մոտ 2 ժամ է տևել, որի ավարտին նրանք համատեղ հռչակագիր են ստորագրել։ Կիրիլ պատրիարքը և Ֆրանցիսկոս պապը կոչ են արել միջազգային հանրությանը` կանխել Մերձավոր Արևելքում և Հյուսիսային Աֆրիկայում քրիստոնյաների նկատմամբ խտրական վերաբերմունքը և նրանց հետապնդումը։
«Մեր եղբայրներն ու քույրերը բնաջնջվում են ընտանիքներով, գյուղերով ու քաղաքներով։ Նրանց վանքերը ենթարկվում են բարբարոսական ոչնչացման, նրանց սրբավայրերը պղծվում են, հուշարձանները՝ ոչնչացվում»,- ասված է հռչակագրում։
Հռոմի պապն ու Կիրիլ պատրիարքը միջազգային հանրությանը կոչ են արել ջանքերը համախմբել ահաբեկչության դեմ պայքարում, թույլ չտալ նոր համաշխարհային պատերազմ։
Հռոմի պապը նշել է, որ հռչակագիրը ոչ թե քաղաքական կամ սոցիալական է, այլ քահանայական, «հանդիպել են երկու եպիսկոպոսներ»:
Ստորագրված փաստաթուղթը բաղկացած է 30 կետից և ներառում է հարցերի շատ լայն շրջանակ՝ ահաբեկչության միջազգային խնդրից և Ուկրաինայի հակամարտությունից մինչև ավանդական արժեքների, օրինակ, ընտանիքի պահպանում:
Մոսկվայի պատրիարքարանի եկեղեցական արտաքին կապերի բաժնի ղեկավարը հայտնել է, որ հոգևոր առաջնորդները պայմանավորվածություն են ձեռք բերել երկու եկեղեցիների սրբավայրեր կաթոլիկների և ուղղափառների համատեղ ուխտագնացություններ իրականացնելու հարցում:
«Հանդիպման ընթացքում մենք խոսել ենք քրիստոնյաների ապագայի մասին, այն մասին, թե ինչպես զարգացնենք մեր համագործակցությունը, խոսել ենք համատեղ նախագծերի մասին, ուխտագնացությունների մասին, ուղղափառների ուխտագնացության մասին դեպի այն սրբավայրերը, որոնք գտնվում են Կաթոլիկ եկեղեցում, կաթոլիկների` ուղղափառների սրբավայրեր ուխտագնացության վերաբերյալ»,- նշել է նա:
