ԵՐԵՎԱՆ, 13 փետրվարի — Sputnik. Ցյուրիխում մեկնարկած Zurich Chess Challenge շախմատի գերմրցաշարի ժամանակ գրոսմայստեր Լևոն Արոնյանի առաջին մրցակիցը Վիշվանաթան Անանդն է, հաղորդում է Հայաստանի շախմատի ակադեմիան։
Նախօրեին կայացել է առաջնության վիճակահանությունը. այն անցկացվեց կայծակնային մրցաշարի տեսքով, և ըստ գրանցված հորիզոնականների` յուրաքանչյուր մասնակից հիմնական մրցաշարում ստացավ այն համարը, որ հորիզոնականը նա զբաղեցրեց այս մրցաշարում։
Բլիցի հաղթող դարձավ ամերիկացի Հիկարու Նակամուրան, որը 5 հնարավորից վաստակեց 3.5 միավոր: Լևոն Արոնյանը 2 միավորով գրավեց 5-րդ տեղը: Առաջնությանը մասնակցում է վեց գրոսմայստեր:
Առաջին տուրում Լևոն Արոնյանի մրցակիցը կլինի աշխարհի նախկին չեմպիոն, հնդիկ Վիշվանաթան Անանդը, երկրորդ տուրում՝ աշխարհի նախկին չեմպիոն, ռուսաստանցի Վլադիմիր Կրամնիկը: Հաջորդ օրը հայ գրոսմայստերի մրցակիցները կլինեն հոլանդացի Անիշ Գիրին ու Իսպանիան ներկայացնող Ալեքսեյ Շիրովը: Փետրվարի 15-ին կայանալիք վերջին տուրում Լևոն Արոնյանը կխաղա ամերիկացի Հիկարու Նակամուրայի հետ:
