Ասուլիսը մեկնարկեց նախատոնական մթնոլորտում, «Հավատամք» երգչախումբը շարականներ երգեց ներկաների համար։
Տոնի հիմքում աստվածաշնչյան պատմություն կա։ Հիսուս Քրիստոսի ծնվելուց 40 օր հետո ծնողները` Հովսեփն ու Մարիամը, պետք է նրան բերեին տաճար Աստծուն ներկայացնելու։
Այդ ժամանակ Երուսաղեմում Սիմեոն անունով մի մարդ էր ապրում, որը տեսիլք էր ունեցել այն մասին, որ կլքի աշխարհը այն ժամանակ, երբ կհանդիպի Հիսուսին կամ Մովսեսին։ Եվ այդ օրը, երբ Մարիամն ու Հովսեփը 40 օրական նորածնին բերեցին եկեղեցի, Սուրբ հոգին Սիմեոնին մատնացույց արեց, որ սա հենց այդ մանուկն է։
«Այստեղից էլ եկել է այդ ավանդույթը, որի համաձայն` 40 օրական երեխան ներկայացավ Հիսուսին, այնպես ինչպես և մենք ենք այս տոնի ժամանակ ընդառաջ գնում Աստծուն», – նշեց Տեր Հակոբ Խաչատրյանը։
Քահանայի խոսքով` մարդն այսօր բազմաթիվ գայթակղություններով է շրջապատված, և մեզանից յուրաքանչյուրը պետք է գնա ընդառաջ հոգևոր, քրիստոնեական արժեքներին։
Ի սկզբանե այս տոնն ասոցացվում էր պտղաբերության ու ամուսնական արարողակարգի հետ, քանի որ այս օրը մի շարք միություններ էին ծնվում։ Եվ այսօր այս տոնը պահպանում է նախկին խորհուրդը։
«Փետրվարի 13-ի երեկոյան սկսվում է նախատոնակը, որից հետո, վառում են կրակը։ Տոնական արարողությունն անցկացվում է փետրվարի 14-ին։ Ըստ ավանդույթի` մի շարք միջոցառումներ են կազմակերպվում», – ասաց քահանան։
Քրիստոնեական կանոնի համաձայն` ամեն տարի փետրվարի 13-ին, երեկոյան ժամերգությունից հետո վառվում են կանթեղները։ Նախատոնակի արարողության ավարտից հետո եկեղեցու կանթեղներից վերցված կրակով վառվում են խարույկները՝ իբրև Քրիստոսի լույսի խորհրդանիշ, և տեղի է ունենում Նորապսակների օրհնության կարգ:
Sputnik Արմենիա միջազգային մամուլի կենտրոնում կազմակերպված ասուլիսի վերջում «Հավատամք» երգչախումբը կրկին շարականներ կատարեց ներկաների համար։
