Անի Լիպարիտյան, Sputnik.
Միջոցառումը մեկնարկեց «Էրեբունի» ռուսական ավիակայանի հրամանատար, գնդապետ Ալեքսանդր Պետրովի ողջույնի խոսքով։ Նա նշեց, որ ավիաներկայացումը նվիրված է Հայրենիքի պաշտպանի օրվան, որը նշվում է փետրվարի 23-ին։
Ավիակայանի հրամանատարությունն ավիացիայի սիրահարներին պարբերաբար հիացնում է նման շոուներով։ Երևանցիները շատ լավ են հիշում, թե 2014 թվականի ամռանը ռուսական լեգենդար «Ստրիժին» ինչպիսի գեղեցիկ հնարքներ էր կատարում երևանյան երկնքում։
Մինչ զինվորական նվագախումբը կատարում էր Հայաստանի և Ռուսաստանի օրհներգերը, թռիչքուղու վրա հավաքված երեխաները սպասում էին իրենց հերթին, որպեսզի վայելեն «ՄԻԳ» կործանիչի մեջ նստելու հաճույքը։ Առանձնահատուկ հետաքրքրություն էին դրսևորում հատկապես փոքրիկ աղջիկները։
Ավիաշոուի մեխը ռազմական ավիացիայի կործանիչների ու ուղղաթիռների ցուցադրական թռիչքներն էին։ Բարձրագույն պիլոտաժի պատկերներ, գլխապտույտ ավիահնարքներ ցածր բարձրության վրա։ Ահա թե ինչ էին ուզում տեսնել օդանավակայանում անհամբերությամբ սպասող հյուրերը։
Միջոցառմանը ներկա էր նաև Հայաստանում ՌԴ արտակարգ և լիազոր դեսպան Իվան Վոլինկինը։
Ռազմահայրենասիրական երգերը ոգևորեցին բոլոր հավաքվածներին։ Ավիաշոուի ավարտին հյուրերը սկսեցին ուսումնասիրել ավիատեխնիկայի ցուցանմուշները, շփվել իրար հետ, համտեսել զինվորական կերակուրը։
«Արդեն ութ տարի է` հետևում ենք ռազմական տեխնիկային, երեխաներ են գալիս նայելու։ Հուսով եմ` նրանցից շատերն էլ օդաչու կդառնան ու որոշակի հաջողությունների կհասնեն այս բնագավառում», — Sputnik Արմենիային ասաց ավագ լեյտենանտ, ավիացիոն համալիրի ինժեներ Ալեքսանդր Օպոլոտը։
Նա նշեց, որ այդպիսի շոուներին մասնակցած շատ տղաներ հավանաբար կորոշեն ռազմական օդաչու դառնալ, որպեսզի թևավոր գեղեցկուհու հետ անվախ սավառնեն օդում։
Տարբեր ինքնաթիռներին ու ուղղաթիռներին մատնացույց անող փոքրիկ Մատվեյի մայրն ասաց, թե շատ կուզեր, որ իր երեք տղաներն էլ շարունակեին հոր գործը ու օդաչու դառնային։
