ԵՐԵՎԱՆ, 12 փետրվարի — Sputnik. Հայկական ընտանիքներում բռնությունները հիմնականում անպատիժ են մնում, ընդ որում` հիմնականում բռնության զոհ են դառնում երեխաները։
Հրապարակախոս ու իրավապաշտպան Զարուհի Հովհաննիսյանի խոսքով` այսօր շատ արդիական է սպանությունների թեման, հիմնականում ամուսինը աֆեկտի ժամանակ սպանում է կնոջն ու անպատիժ մնում։
«Աֆեկտում գտնվելու հանգամանքը շատերը որպես արդարացում են օգտագործում։ Բացատրում են, որ մարդը գործել է աֆեկտի վիճակում և չի գիտակցել կատարածը։ Ստացվում է, որ յուրաքանչյուր ոք կարող է հանցագործություն կատարել, սպանել մեկին ու ասել, որ եղել է աֆեկտի վիճակում», — ասաց Հովհաննիսյանը։
Ընտանեկան բռնությունների հետևանքով ամենից շատ տուժում են երեխաները։ Նրանք հոգեբանական ծանր վիճակում են հայտնվում նաև ծնողների ամուսնալուծության ժամանակ, քանի որ պետք է ընտրություն կատարեն`ու՞մ հետ ապրել։ Սա իրավապաշտպանների կարծիքով` ճիշտ չէ, քանի որ երեխան հոգեբանորեն դեռ պատրաստ չէ նման կարևոր ընտրություն կատարելուն։ Ընդ որում` նա կարող է գտնվել այս կամ այն կողմի ազդեցության տակ։
Հովհաննիսյանը նշում է, որ լինում են իրավիճակներ, երբ ծնողներից մեկը տարբեր պատճառներ է հորինում, որպեսզի երեխան չհանդիպի մյուս ծնողի հետ։
«Ծնողն անդադար նշում է, որ երեխան սթրես է տանում, հիվանդ է կամ չի ցանկանում տեսնել մորը կամ հորը», — նշում է փաստաբան Նոնա Գալստյանը և ավելացնում, որ հարաբերությունները մտնում են փակուղի, և կողմերը տարիներ շարունակ չեն կարողանում դուրս գալ այդ փակ շղթայից։
Ավելի վաղ Հայաստանի քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանը հայտնել էր, որ արդեն երկու տարի է` Հայաստանում գործում է ընտանեկան բռնությունների դեմ պայքարի վարչությունը, որն ուսումնասիրում ու կանխում է բռնության դեպքերը։
2015 թվականին գրանցվել է ընտանեկան բռնության 784 դեպք 150-ի նկատմամբ քրեական գործ է հարուցվել։ Այս ցուցանիշը գերազանցում է 2014 թվականի ցուցանիշը։
