ԵՐԵՎԱՆ, 12 փետրվարի-Sputnik. Գոհար Սարգսյան. Երևանը նեղացած է քաղաքացիներից։ Հայ մտավորականները համարում են, որ իրենք էլ մեղքի բաժին ունեն, քանի որ ուշ են բարձրաձայնել արդիական խնդիրը։ Հին ու արժեքավոր շենքերը քանդողները սովորություն են դարձրել հատկապես գիշերը գործի դնել բուլդոզերները, որ իրենց «սև» գործը խանգարողներ չլինեն։ Sputnik Արմենիայի թղթակիցը ներկայացնում է անարդարությանն ընդդիմացող արվեստագետների քննադատություններն ու հարազատ քաղաքին ուղղված սիրո խոստովանությունները։
Տիգրան Հեքեքյան
«Հայաստանի փոքրիկ երգիչներ» երգչախմբի դիրիժոր և գեղարվեստական ղեկավար
![Тигран Экекян Тигран Экекян - Sputnik Արմենիա](https://cdn.am.sputniknews.ru/img/194/12/1941263_0:0:1600:1167_600x0_80_0_0_d57d813dbcbffdce739bf19c7e27f426.jpg)
Ես մեղավոր եմ, որ իմ արվեստով եմ զբաղվել ու այնպես չեմ արել, որ սերունդն ունենա ավելի ջերմ քաղաք։ Ապրել բետոնե քաղաքում և անվանել, որ սա գեղեցիկ քաղաք է, նշանակում է այդ մարդիկ խիղճ ու ամոթ չունեն։ Թող ճչացող ավանգարդ շենքեր լինեն, բայց դրանց կողքին պահպանվեն նաև հները։ Երբ վերևից, կողքից ու տակից նայում ես քաղաքիդ, ամաչում ես, որ քարակույտում ես ապրում։ Ասում ենք` պետության գերակա շահ։ Ինչքա՞ն կարելի է դա շահարկել անձնական գրպանը լցնելու համար։
Հրանտ Վարդանյան
Ռեժիսոր
![Грант Варданян Грант Варданян - Sputnik Արմենիա](https://cdn.am.sputniknews.ru/img/194/05/1940593_0:0:1600:1254_600x0_80_0_0_9643f73880d76a4f50519a9d584910ad.jpg)
Երևանը նեղացել է երևանցիներից։ Գողեգող գալիս են ու քանդում Երևանը։ Վախենում եմ, որ մի օր կարող եմ արթնանալ և Պուշկինն ու Աբովյանը քանդված տեսնել։ 21-րդ դարում կառուցված ճարտարապետական կառույց չունենք, որով հպարտանանք։ Ո՞ւր են մեր ճարտարապետները։ Նրանք պետք է ոչ թե մատիտը ձեռքին նկարող լինեն, այլ` «ողնաշարով» տղաներ։
Միքայել Պողոսյան
Դերասան, սցենարիստ, ռեժիսոր, երգիչ
![Микаэл Погосян Микаэл Погосян - Sputnik Արմենիա](https://cdn.am.sputniknews.ru/img/194/03/1940396_0:0:1600:1152_600x0_80_0_0_fad40b60baa009b16e94257fd591b162.jpg)
Եկել ենք սեր խոստովանենք մեր քաղաքին։ Մեր քաղաքը միշտ եղել է կենդանի օրգանիզմ, կենդանի շունչ, որը կարոտում է, նեղանում, հիասթափվում։ Այդ քաղաքի դիմանկարը մենք ենք։ Այսօր Երևանը թիկունքի կարիք ունի։ Մեր քաղաքի դիմանկարն աղավաղված է։ Ես հասկանում եմ, որ Երևանը պետք է փոփոխվի, բայց ինչի՞ հաշվին։ Քաղաքաշինության փոխարեն շենքաշինություն է։ Մեր շարժումը հաղթական ավարտ կունենա։ Այդ կարգախոսով ենք եկել։
Մարկ Գրիգորյան
Լրագրող
![Марк Григорян Марк Григорян - Sputnik Արմենիա](https://cdn.am.sputniknews.ru/img/194/13/1941381_0:0:1600:984_600x0_80_0_0_a306a3189e20bf0629a65ad732cbae26.jpg)
Ինչպե՞ս է ստացվում, որ, հպարտանալով հայ ժողովրդի հազարամյակների պատմությամբ, ոչնչացնում ենք պատմության վկաներին։ Զարմանալի ձևով մենք մեզ զրկում ենք անցյալից և ապագայից։ Ինձ շատ անգամ ասում են` այս շենքը սիրուն չէ, պետք է քանդել։ Ասեմ, որ սիրունը չափանիշ չէ, գեղեցիկն է չափանիշ։
Հրանտ Թոխատյան
Դերասան, մշակութային գործիչ
![Грант Тохатян Грант Тохатян - Sputnik Արմենիա](https://cdn.am.sputniknews.ru/img/194/03/1940309_0:0:1600:1208_600x0_80_0_0_32296704a8e8c38ae2e9c4c73d4e43ba.jpg)
Վերցնենք Հյուսիսային պողոտան։ Գուցե դա ասօրվա երիտասարդների համար հաճելի վայր է, բայց ինձ մի կարևոր բան է պակասում։ Ոչ թե այն «ճենջն» եմ ուզում հիշել, այն խարխուլ շենքերը, որոնք ամբողջովին առնետանոց էին։ Պարզապես ամեն ինչը պետք է անել շնորհքով ու կարգին։ Ժամանակին Թամանյանը եկավ ու վայելք տվեց իմ քաղաքին։ Եկեք այդ դեմքն անիմաստ չշպարենք։ Բնականն ավելի գեղեցիկ է։ Վարդագույն Երևանը կորել է։ Ինչ այլանդակ գույն ասես կա։
Զարուհի Մուրադյան
«Սարգիս Մուրադյան» պատկերասրահի հիմնադիր
![Заруи Мурадян Заруи Мурадян - Sputnik Արմենիա](https://cdn.am.sputniknews.ru/img/194/04/1940474_0:0:1600:1199_600x0_80_0_0_50a6b71040e06dbc05d38f02f7903544.jpg)
Երբ գնում ենք եվրոպական քաղաք, վերցնում ենք քարտեզն ու գտնում «Old town»: Համոզված եմ, որ զբոսաշրջիկները Փարիզի հին թաղամասերն են առաջինն այցելում։ Առաջարկում եմ նամակ մշակել, որտեղ լինի առաջարկ 10 տարով դադարեցնել Երևանի դեմ կատարվող բարբարոսությունները։
Զավեն Սարգսյան
Սերգեյ Փարաջանովի արվեստի թանգարանի տնօրեն
![Завен Саркисян Завен Саркисян - Sputnik Արմենիա](https://cdn.am.sputniknews.ru/img/194/06/1940670_0:0:1600:1114_600x0_80_0_0_26213d6e3a4e923f682516075104417a.jpg)
Ինձ ասում են` ինչու՞ չես գնում արտասահման։ Պատասխանում եմ, որ հիշողություններ ունեմ քաղաքի հետ կապված։ Բայց եթե Երևանի դեմքը կորի, արժեքն էլ կկորցնի։
Արամո
Երգիչ
![Арамо Арамо - Sputnik Արմենիա](https://cdn.am.sputniknews.ru/img/194/15/1941527_0:0:1600:1137_600x0_80_0_0_389210a0b686e4a0c36a91a68b18d583.jpg)
Ուզում եմ խոսել Պուշկինի անկյունում գտնվող Հրշեջների շենքի մասին։ Դրա ինժեներներից մեկն իմ ապուպապն է։ Դա քանդելու փոխարեն կարելի է մշակութային օջախ ստեղծել։ Ես այդքան գումար չունեմ։ Եթե ունենայի, կգնեի շենքն ու մի գեղեցիկ վայր կստեղծեի։
Արթուր Իսպիրյան
Երգիչ
![Артур Испирян Артур Испирян - Sputnik Արմենիա](https://cdn.am.sputniknews.ru/img/194/00/1940057_0:0:1600:1120_600x0_80_0_0_e82e42719f2e6136d775b13846ff6998.jpg)
Նրանց տակտիկան է։ Թողնում են, որ շենքը դառնա վթարային, հետո քանդում են ու կառուցում ցանկացածը։ Մենք շատ-շատ ենք։ Թող որևէ մեկը չքանդի այդ շենքերն ու չդիպչի մեր պատմությանը։
Լիլիթ Պիպոյան
Երգչուհի, երգահան, ճարտարապետ
![Լիլիթ Պիպոյան Լիլիթ Պիպոյան - Sputnik Արմենիա](https://cdn.am.sputniknews.ru/img/194/25/1942526_0:0:1600:1194_600x0_80_0_0_17a8dcd811d179ce56656daf477b702d.jpg)
Եթե պետք լինի, կպառկեմ Հրշեջների շենքի մոտ ու թույլ չեմ տա, որ քանդեն։ Դա կառուցել է Նիկողայոս Բունիաթյանը`մեր քաղաքի առաջին գլխավոր ճարտարապետը։ Վերջապես հարգանք պետք է ունենալ, թե չէ մեր մեծերի հանդեպ։ Եվ վերջապես ով է որոշում` դա լավն է, թե վատը։
Դավիթ Մաթևոսյան
«Հրանտ Մաթևոսյան» մշակութային- բարեգործական հիմնադրամի տնօրեն
![Давид Матевосян Давид Матевосян - Sputnik Արմենիա](https://cdn.am.sputniknews.ru/img/194/16/1941620_0:0:1600:1163_600x0_80_0_0_93cb8a659ac88ee647bc817283e878e5.jpg)
Մեր քաղաքը մոտավորապես 2800 տարեկան է։ Թող ինձ ցույց տան պատմական որևէ շենք, որ վկայում է 2800 տարեկանի մասին։ «Էրեբունի» ամրոցը խնդրում եմ աչքս չմտցնել։ Սա սխալ ռեկոնստրուկցիայի արդյունք է, որը վկայում են ֆրանսիացի ու բրիտանացի մասնագետները։ Մենք շարունակում ենք աշխարհին ներկայանալ որպես հին քաղաք։ Ո՞րն է մեր ապացույցը։
Արվեստագետների ընտրած պայքարի ուղիները տարբեր են, բայց բոլորն էլ միտված են փրկելու հին ու նոր Երևանը։ Մամուլի ասուլիսից հետո նրանք ուղղվեցին խոստումները գործի վերածելու` պայմանով, որ դեռ կխոսեն արած-չարածների մասին։