ԵՐԵՎԱՆ, 12 փետրվարի — Sputnik. ՀԱՊԿ գլխավոր քարտուղար Նիկոլայ Բորդյուժան Սիրիայի վերաբերյալ բանակցությունները հուսադրող է անվանեց։
Նախօրեին Բավարիայում անցկացվել է Սիրիայի աջակցման միջազգային խմբի նիստը, որի արդյունքում որոշվել է մեկ շաբաթում լուծել երկրին մարդասիրական օգնություն տրամադրելու անհրաժեշտությունն ու ռազմական գործողությունների դադարեցման միջոցները։
Բորդյուժայի կարծիքով` հանդիպումն արդյունավետ էր, կարևոր որոշումներ ընդունվեցին, որոնք թույլ կտան կայունացնել և՛ Սիրիայի, և՛ տարածաշրջանի իրավիճակը։ Կողմերը կարողացան պայմանավորվածություն ձեռք բերել Սիրիայի տարածքում ռազմական գործողությունները համակարգելու շուրջ։
«Պայմանավորվածություն ձեռք բերվեց աշխատանքային մի քանի խումբ ստեղծելու մասին, որոնք իմ կարծիքով` բավականին կառուցողական աշխատանք կիրականացնեն։ Իհարկե, չեմ համարում, որ սա առաջընթաց է, սակայն պետք է գոնե վստահ լինել այն հարցում, որ Մյունխենում բավականին լուրջ, կառուցողական քայլ է կատարվել»,- ասաց Բորդյուժան Sputnik Արմենիա միջազգային մամուլի կենտրոնում կազմակերպված մուլտիմեդիոն ասուլիսի ժամանակ։
Ինչ վերաբերում է այն հարցին, որ ռազմական գործողությունների ավարտից հետո «Տրիումֆ» (С — 400) զենիթահրթիռային համակարգերը կմնան Սիրիայում, ապա ՀԱՊԿ գլխավոր քարտուղարը նշեց, որ այդ հարցն ամբողջովին գտնվում է Ռուսաստանի Դաշնության ղեկավարության ձեռնահասության ներքո։
