ԵՐԵՎԱՆ, 12 փետրվարի- Sputnik. Հայաստանում և Տաջիկստանում ռուսական ռազմակայանները գտնվում են վերազինման, նոր սերնդի ռազմական տեխնիկայով համալրվելու փուլում, ասաց ՀԱՊԿ գլխավոր քարտուղար Նիկոլայ Բորդյուժան` պատասխանելով Գյումրու 102-րդ ռազմակայան նոր ռազմական տեխնիկա տեղափոխելու ակտիվ գործընթացի մասին հարցին։
«Ե՛վ 201-րդ բազան, և՛ 102-րդ բազան ներառված են վերազինման համակարգում, որն այսօր տեղի է ունենում Ռուսաստանի զինված ուժերում… Խոսքն այդ բազաներում ռազմական ներուժի ամրապնդման, դրանց ուժեղացման մասին է։ Խոսքը զինված խմբավորումներին ժամանակակից սպառազինություն և տեխնիկա տրամադրելու, ռազմական կազմավորումների բավական մակարդակն ապահովելու մասին է»,- ասաց Բորդյուժան Sputnik Արմենիա միջազգային մամուլի կենտրոնում կազմակերպված մուլտիմեդիոն ասուլիսի ժամանակ։
Նա նշեց, որ ցանկացած միավորման ամրապնդմանը, մարտունակությանը, սպառազինությունների ժամանակակից տեսակներով հագեցվածությանն ուղղված բոլոր միջոցառումները տեղի են ունենում մշտական հիմունքով։
«Իմաստ չունի խոսել այն մասին, որ Ռուսաստանը դիտավորյալ և նպատակաուղղված ուժեղացնում է այդ բազաներում ռազմական պոտենցիալը»,- եզրափակեց ՀԱՊԿ գլխավոր քարտուղարը` նշելով, որ այդ գործընթացը վերաբերում է ՌԴ գրեթե բոլոր զինված ուժերին։
Փաստացի խոսքն այն մասին է, որ 102-րդ ռազմակայանը բոլորովին էլ արտառոց կերպով չի ուժեղացնում իր ներուժը, քանի որ առկա ուժերը լիովին բավարար են հայ-թուրքական սահմանի անվտանգությունն ապահովելու համար։ Բորդյուժայի խոսքով` ընդամենը մշտական պլանային աշխատանք է ընթանում։
Ռուսական 102-րդ ռազմակայանը տեղակայված է Հայաստանի Գյումրի քաղաքում։ ռազմակայանը մարտական հերթապահություն է իրականացնում ԱՊՀ ՀՕՊ միավորված համակարգի շրջանակում։ Ռուսաստանի Անվտանգության դաշնային ծառայության սահմանային վարչությունը հսկում է հայ-թուրքական պետական սահմանը (330 կմ) և հայ-իրանական սահմանը (45 կմ)։
