ԵՐԵՎԱՆ, 12 փետրվարի- Sputnik. ՀԱՊԿ-ն արձագանքել է, արձագանքում է և արձագանքելու է դաշնակիցների անվտանգությանն ուղղված ցանկացած գործողության, հայտարարել է Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան Sputnik Արմենիա միջազգային մամուլի կենտրոնում Երևանից տեսամիացումով մամուլի ասուլիսի ժամանակ։
«Ինձ միշտ զարմացնում է, երբ ԶԼՄ-ների առանձին ներկայացուցիչներն ասում են, որ ՀԱՊԿ-ն չի արձագանքում։ Պետք է ծանոթանալ ՀԱՊԿ հայտարարություններին… Դրանցում միշտ Կովկասի վերաբերյալ հատվածներ կան»,- ասաց Բորդյուժան` պատասխանելով ղարաբաղյան հակամարտության շուրջ իրավիճակին ՀԱՊԿ-ի արձագանքի անհրաժեշտության մասին հարցին։
Նա նշեց, որ բառացիորեն մեկ ամիս առաջ Ռոսիա-24 հեռուստաալիքի եթերում հայտարարել է, որ հայ-ադրբեջանական սահմանին լարվածության սրումն անթույլատրելի է։ Բորդյուժան նշեց, որ բոլոր այս տարիների ընթացքում նման հայտարարություններ են հնչել նաև ՄԱԿ-ի հարթակից։
Ավելի վաղ Բորդյուժան Երևան կատարած այցի ընթացքում հերթական անգամ հիշեցրել էր, որ միջամտության մեխանիզմները կարող են գործարկվել միայն այն դեպքում, երբ պետությունն ի վիճակի չէ ապահովել սեփական կայունությունն ու անվտանգությունը։ Նման դեպքում այդ պետությունը պաշտոնապես դիմում է դաշնակիցներին օգնության համար, և նրանք որոշում են ընդունում անհրաժեշտ ռազմական կամ քաղաքական աջակցության մասին։
Նշենք, որ 2015թ.-ի դեկտեմբերի 21-ին Հայաստանի նախագահ Սերժ Սարգսյանը Մոսկվայում ՀԱՊԿ հավաքական անվտանգության խորհրդի նստաշրջանի ընթացքում հայտարարել էր, որ ամեն անգամ, երբ Ադրբեջանի զինված ուժերը Հայաստանի Հանրապետության դեմ կիրառում են բոլոր տրամաչափերի զենքեր, ականանետներ և հրետանային սարքեր, նրանք կրակում են Մոսկվայի, Մինսկի, Աստանայի, Դուշանբեի և Բիշքեկի վրա։
ՀԱՊԿ-ն հիմնադրվել է 2002թ.-ին, և հիմա դրա կազմի մեջ մտնում է վեց պետություն` Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։ Հայաստանի Հանրապետությունը ստորագրել է հավաքական անվտանգության մասին պայմանագիրը 1992թ.-ի մայիսի 15-ին Տաշքենդում։ Ուզբեկստանը նույնպես եղել է կազմակերպության անդամ, բայց նրա մասնակցությունը դադարեցվել է 2012թ.-ի դեկտեմբերին։
