ԵՐԵՎԱՆ, 11 փետրվարի — Sputnik. Ստամբուլում փետրվարի 6-ին հայազգի տարեց ամուսինների սպանության և նրանց բնակարանը կողոպտելու մեջ մեղադրվող Հայաստանի 8 քաղաքացի է ձերբակալվել Տրապիզոն քաղաքում, հայտնեց Sputnik Արմենիայի թղթակից Նաիրա Մկրտչյանը Թուրքիայից:
Նշենք, որ հարձակումը կատարվել էր Շիշլիի Ջումհուրիեթ փողոցում բնակվող հայ 85-ամյա Հակոբ Յաքուփ Դեմիրջիի և 79-ամյա Սեդա Աիդա Դեմիրջիի տան վրա։ Հանցագործները սպանել էին Հակոբ Դեմիրջիին` հայ զույգին կապելով խոզի կաշվից պատրաստված պարանով. մեթոդն օգտագործվում է Թուրքիայում այլադավաններին նվաստացնելու համար, նաև տնից վերցրել էին թանկարժեք իրեր և գումար ու դիմել փախուստի։
Փետրվարի 10-ին Տրապիզոնի հանրապետական դատախազությունը հայտարարություն էր տարածել, որ հարձակում իրականացրածները ՀՀ քաղաքացիներ են: Ձերբակալված 8 անձանցից 5-ը կին է, 3-ը` տղամարդ, բոլորն էլ` ՀՀ քաղաքացիներ: Հայաստանի արտգործնախարարությունը հաստատել է, որ Ստամբուլի Շիշլի թաղամասում հարձակմանը մեղսակցություն ունենալու կասկածանքով ձերբակալվածների թվում, նախնական տվյալներով, կան ՀՀ քաղաքացիներ։
Նաիրա Մկրտչյանը հայտնեց, որ դեպքը մեծ աղմուկ է բարձրացրել, և ոստիկանությունն անմիջապես սկսել է քննել գործը, օրեր անց հանցագործ խումբը ձերբակալվել է Տրապիզոնում։ Պարզվել է, որ նրանք Հայաստանից էին, գնացել էին Տրապիզոն, որպեսզի այնտեղից էլ մեկնեին Հայաստան։
Ըստ վարկածի` նախաձեռնողը Դեմիրջիների ընտանիքում աշխատող անձն է եղել, որը զանգել է Հայաստան իր ընկերներին և ասել, որ այս ընտանիքը շատ փող ունի, ու հենց նա էլ բացել է դուռը։ Ձերբակալվածները հիմա Ստամբուլում են և հարցաքննվում են։
Տրապիզոնում ձերբակալվածների բնակարանում հայտնաբերվել է ձեռքի ժամացույց, 20 հազար դոլար և 1 միլիոն լիրա արժողությամբ (մոտ 350 հազար դոլար) գոհարեղեն։ Չի բացառվում, որ այս գործով նոր ձերբակալություններ լինեն, տեղեկացնում է Sputnik Արմենիայի թղթակիցը։
Ստամբուլում տեղի ունեցած ևս մեկ աղմկահարույց իրադարձություն էր հարձակումը իշխանամետ Yeni Şafak և Yeni Akit թերթերի գրասենյակների վրա։ Շինություններում հրդեհ է բռնկվել, որը հաջողվել է արագ մարել։
Տեղի ունեցածի մասին Ստամբուլի հայկական «Ակոս» շաբաթաթերթի խմբագրապետ Բագրատ Էստուկյանը Sputnik Արմենիա ռադիոկայանին հայտնեց, որ դեռևս անհայտ է, թե ով է կատարել հարձակումը։ Նա չբացառեց, որ գուցե սարքված հարձակում է, քանի որ թերթերն իշխանամետ են, և հարձակման որևէ առիթ չկա։ Միայն շենքի ապակիներն են կոտրվել, մի քանի փամփուշտի մնացորդ կա, ուրիշ ոչինչ։ Ոստիկանները փորձում են որևէ տեղեկություն իմանալ` դիտելով շրջապատի տեսախցիկների տեսագրությունները։
