Գոհար Սարգսյան. Sputnik
«Ուշադրություն. խոսում է Մոսկվան». Խորհրդային Միության քաղաքացիներն անգիր գիտեն այս արտահայտության «ձայնի» հեղինակին։ Լևիտանի ձայնով «սկսվեց ու ավարտվեց» Հայրենական մեծ պատերազմը։ Անվանի ռադիոհաղորդավարը գլխավորում էր «Ռայխի սև ցուցակն» ու համարվում էր Հիտլերի համար մեկ թշնամին։ Ասում են, որ Ֆյուրերը լսել է նրա ձայնն ու միանգամից հասկացել` Լևիտանը «կատյուշաներից» էլ վտանգավոր է։
Կարմիր լոբով աղցան ու խորոված. այս ուտեստներն էր սիրում ճաշակել Լևիտանը Հայաստանում։ Ռադիոհաղորդավար Սարգիս Նաջարյանն այսօրվա պես հիշում է այն օրը, երբ հայկական ռադիոյի ներկայացուցիչները նրան հրավիրեցին ռեստորան։
«Կոկորդի համար հոգի էր տալիս։ Սառը չխմեց, չափավոր կերավ։ Ամբողջ ընթացքում ասում էր` պետք է պահպանեմ ձայնս»,- պատմեց Սարգիս Նաջարյանը։
Հիմա Նաջարյանը «սրբության» պես է պահում այդ օրվանից մնացած` Լևիտանի հետ լուսանկարը։
«Սա թանկ լուսանկար է ինձ համար։ Լևիտանի հետ ամեն մեկն առիթ չէր ունենա շփվելու։ Շատ քաղաքական գործիչներ երազում էին լուսանկարվել նրա հետ»,-ասաց հաղորդավարը։
Նաջարյանին հատկապես զարմացրել էր Լևիտանի համեստությունն ու չափավորությունը։
«Անվանի ռադիոհաղորդավարն այնքան համեստ ու խոնարհ էր, որ ամաչում էինք նրա ներկայությունից, — պատմեց Նաջարյանը: — Նա այն Լևիտանը չէր, որին սպասում էինք տեսնել։ Կարծում էինք` պիտի ասեր. «Ես այն մարդն եմ, ով պատերազմի ժամանակ մեծ դերակատարություն ուներ, ում գլուխը գնահատվել էր 250 000 գերմանական մարկ: Այնինչ նա 60-ն անց մարդ էր` բազմաթիվ դժվարություններով անցած, բայց շատ պինդ ու տոկուն»։
Յուրի Լևիտանի լավագույն խորհուրդը հայ ռադիոհաղորդավարին այն էր, որ աշխատանքի մեջ պետք է սեր դնել, որպեսզի լավ ստացվի։
«Պետք է սիրել». անընդհատ կրկնում էր Լևիտանը:
Անվանի ռադիոհաղորդավարի անունով կոչվող «Խոսում ենք ինչպես Լևիտանը» մրցույթը նպատակ ունի օգնել սկսնակ ռադիոհաղորդավարներին` զարգացնելու պրոֆեսիոնալ մակարդակը և ցույց տալու, որ կան տաղանդավոր կադրեր, որոնց պետք է ասպարեզ հանել։ Մրցույթին մասնակցելու հայտերն ընդունվում են փետրվարի 1-ից մինչև ապրիլի 25-ը։
