Վախթանգ Կիկաբիձեն Sputnik-ին պատմել է իր հիշողությունները` նշելով, որ հայտնի «Միմինո» ֆիլմն ուրիշ ավարտ է ունեցել, որը դուր չի եկել խորհրդային գրաքննությանը։
«Ֆիլմի ավարտն ամբողջությամբ հանվել է։ Ֆիլմը բոլորովին այլ կերպ է ավարտվում, ողջ հետաքրքրությունն ավարտն էր»,- նշել է դերասանը։
«Ֆիլմի վերջում, թռչելով հայրենիքի վրայով, Միմինոն ուղեկցորդուհու հետ զրույցից հետո… դուրս է գալիս ինքնաթիռից։ Իսկ ֆիլմում դա չկա»,- պատմել է Կիկաբիձեն։
Այդ փոփոխության հետ կապված` «Միմինո» ֆիլմից ամբողջությամբ հանվել է Պյոտր անունով հերոսը։
Ինչպես պատմել է դերասանը, ֆիլմի սցենարի համաձայն` Պյոտրը պայտում է ձիերին և խնդրում Վալիկոյին` իրեն ուղարկել ամերիկյան պայտեր։ Այն բանից հետո, երբ Միմինոն դուրս է գալիս ինքնաթիռից, տեղի է ունենում Վալիկոյի և Պյոտրի զրույցը, շուրջը երևում են լեռների ձյունապատ գագաթները, երաժշտություն է հնչում։
