ԵՐԵՎԱՆ, 11 փետրվարի — Sputnik. Հրուշակագործները կմասնակցեն Մոսկվայում կայանալիք «Շոկոլադե գյուղ» փառատոնին։
«Հայաստանը կներկայացնի Arcolad ընկերությունը։ Հուսով ենք, որ հայկական այլ կազմակերպություններ նույնպես կմասնակցեն փառատոնին։ Համենայն դեպս, գործընկերների հետ բանակցությունները դեռ քննարկման փուլում են», — Sputnik Արմենիային հայտնեցին միջոցառման կազմակերպիչները։
Հայաստանում հրուշակագործության ոլորտը բավականին զարգացած է։ Խանութներում վաճառվում է և՛ տնային պայմաններում պատրաստած հրուշակեղեն, և՛ հայրենական գործարանային արտադրանք։
Հայաստանում գործում է հրուշակեղենի ավելի քան 10 խոշոր ընկերություն, որոնք արտադրում են շոկոլադ, պաղպաղակ, թխվածքեղեն և այլ քաղցրավենիք։ Մեծամասշտաբ փառատոնն այցելուների համար տարբեր ծրագրեր է պատրաստել` շոկոլադե զգեստների ցուցադրություն, աշխարհի ամենահայտնի շոկոլադագործների հետ հանդիպումներ։
Հինգերորդ փառատոնն ամենախոշորը կլինի։ Նախնական տվյալով` ցուցահանդեսն ավելի քան 30 հազար այցելու կունենա, ինչը երկու անգամ շատ է 2015 թվականի ցուցանիշից։ Փառատոնը կանցկացվի Կրասնայա Պրեսնա փողոցի վրա գտնվող Էքսպոկենտրոնում։
Salon du Chocolat-ի պատմությունը սկիզբ է առել 1994 թվականին, երբ շոկոլադի երկրպագուներ Սիլվի Դուսն ու Ֆրանսուա Ժանտեն առաջին անգամ սպառողներին ու վաճառողներին հավաքեցին, որպեսզի շփվեն ու միմյանց փոխանցեն կուտակած փորձը։ Առաջին փառատոնն այնքան մեծ հաջողություն ունեցավ, որ այսօր ամեն տարի աշխարհում անցկացվում է շուրջ 20 «շոկոլադային» փառատոն։ Ռուսաստանում առաջին անգամ փառատոնն անցկացվել է 2006 թվականին։
