ԵՐԵՎԱՆ, 11 փետրվարի — Sputnik. Կառավարությունն այսօր չեղյալ համարեց «Կարեն Դեմիրճյանի անվան մարզահամերգային համալիր»-ը վաճառելու մասին անցած տարվա իր որոշումն ու լուծարեց «ՆՏԱԱ ինվեստմենտ գրուպ» ընկերության հետ կնքված առքուվաճառքի պայմանագիրը։
Որոշման պատճառն այն է, որ մասնավոր ընկերությունը սահմանված ժամկետում չի կատարել գույքի դիմաց վճարումը:
Մարզահամերգային համալիրի բաժնետոմսերը վերադառնում են Հայաստանի Պաշտպանության նախարարության հաշվեկշռին:
ՀՀ վարչապետ Հովիկ Աբրահամյանի առաջարկով կնախապատրաստվի կառավարության որոշման նախագիծ, որով Մարզահամերգային համալիրը կփոխանցվի Պետական գույքի կառավարման վարչության հաշվեկշռին:
Անցած տարվա օգոստոսին կառավարությունը որոշեց համալիրը 30 միլիոն դոլարով վաճառել «ՆՏԱԱ ինվեստմենտ գրուպ»-ին, որը պարտավորվել էր բացի նշված 30 միլիոնից առաջիկա չորս տարում կատարել ևս 100 միլիոն դոլարի ներդրում:
