ԵՐԵՎԱՆ, 10 փետրվարի — Sputnik. Նախարարական պորտֆելների ու մարզպետների պաշտոնների մասին մանրամասները հայտնի կդառնան շաբաթվա վերջին, չորեքշաբթի լրագրողներին ասաց իշխող կուսակցության մամուլի քարտուղար, խորհրդարանի փոխխոսնակ Էդուարդ Շարմազանովը։
Նրա խոսքով` «ՀՅԴ- հետ ՀՀԿ-ն ունի նախնական համաձայնություն՝ հետագայում կառավարման համակարգում միասին աշխատելու մասին: Վերջնական համաձայնության ու մանրամասների մասին դուք կտեղեկանաք մինչև շաբաթ վերջ: Այսօր ունենք ՀՅԴ-ի հետ նախնական ընդհանուր համաձայնություն»,-ասաց Շարմազանովը:
Հունվարին Դաշնակցությունը հայտնել էր ՀՀԿ-ի հետ կոալիցիա կազմելու իր որոշման մասին։ Բանակցությունները ՀՀԿ և Դաշնակցություն կուսակցության միջև դեռ շարունակվում են։ Համագործակցելու համար հիմք է հանդիսացել այն, որ դաշնակցականները աջակցել են նոր սահմանադրությանը, որի հանրաքվեն անցկացվել էր 2015 թվականի դեկտեմբերի 6-ին։ Կուսակցությունների պատասխանատվության ոլորտները կարող են առանձնացվել։ ԶԼՄ-ների տվյալներով` Դաշնակցությանը կարող են բաժին հասնել նախարարական պորտֆելները արդարադատության, գիտության ու կրթության ու տարածքային կառավարման ոլորտներում։
