ԵՐԵՎԱՆ, 10 փետրվարի — Sputnik. ՀՀ նախագահ Սերժ Սարգսյանը ստորագրել է հրամանագիր` Հայաստանի Հանրապետության Նախագահին առընթեր սահմանադրական բարեփոխումների իրավական ապահովմանն աջակցող մասնագիտական խորհրդակցական խորհուրդ ստեղծելու մասին, հայտնում է նախագահի մամուլի ծառայությունը։
Հրամանագրում նշված ընդհանուր դրույթների համաձայն` մասնագիտական խորհրդակցական խորհուրդը իրավասու պետական մարմիններին պետք է ներկայացնի առաջարկություններ Սահմանադրության փոփոխություններով պայմանավորված՝ ընդունման, փոփոխման կամ լրացման ենթակա օրենքների շրջանակի վերաբերյալ, իսկ իրավասու պետական մարմինների նախաձեռնությամբ համապատասխան նախագծերի կապակցությամբ տրամադրի մասնագիտական խորհրդատվություն։
Ինչպես հայտնում են ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունից, հաստատվել է նաև խորհրդակցական խորհրդի անհատական կազմը։
Ըստ այդմ՝ կազմում ընդգրկվել են Հայաստանի Հանրապետության սահմանադրական դատարանի նախագահ Գագիկ Հարությունյանը (խորհրդի նախագահ, համաձայնությամբ), Հայաստանի Հանրապետության կառավարության աշխատակազմի ղեկավար-նախարար Դավիթ Հարությունյանը, Հայաստանի Հանրապետության Ազգային ժողովի աշխատակազմի ղեկավար Հրայր Թովմասյանը (համաձայնությամբ), Մարդու իրավունքների եվրոպական դատարանում Հայաստանի Հանրապետության կառավարության լիազոր ներկայացուցիչ, Հայաստանի Հանրապետության գլխավոր դատախազ Գևորգ Կոստանյանը (համաձայնությամբ), Հայաստանի Հանրապետության Նախագահի օգնական Հրայր Ղուկասյանը, Բարձրաստիճան պաշտոնատար անձանց էթիկայի հանձնաժողովի նախագահ Սիրանուշ Սահակյանը (համաձայնությամբ), Հայաստանի Հանրապետության Նախագահի աշխատակազմի իրավաբանական վարչության պետ Գրիգոր Մուրադյանը, «Հայաստանի Հանրապետության իրավաբանների ասոցիացիա» հասարակական կազմակերպության նախագահ Գագիկ Ղազինյանը (համաձայնությամբ), «Սահմանադրական իրավունքի կենտրոն» հասարակական կազմակերպության խորհրդի նախագահ Գևորգ Դանիելյանը (համաձայնությամբ), Գերմանիայի միջազգային համագործակցության ընկերության (GIZ) «Հարավային Կովկասում իրավական և դատական բարեփոխումների համար խորհրդատվություն» ծրագրի ղեկավար Վարդան Պողոսյանը (համաձայնությամբ)։
