ԵՐԵՎԱՆ, 10 փետրվարի — Sputnik. ՌԴ ԱԳՆ-ն կուսումնասիրի Թուրքիայի հետ բարեկամության մասին պայմանագիրը խզելու առաջարկը, ասել է գերատեսչության պաշտոնական ներկայացուցիչ Մարիա Զախարովան։
Պետդումայի պատգամավորներ Վալերի Ռաշկինն ու Սերգեյ Օբուխովը նամակ են հղել Ռուսաստանի նախագահ Վլադիմիր Պուտինին ու արտգործնախարար Սերգեյ Լավրովին և առաջարկել են չեղարկել ռուս-թուրքական բարեկամության ու եղբայրության մասին պայմանագիրը, որը ստորագրվել է 1921թ.-ի մարտի 16-ին։ Պատգամավորներն իրենց նամակում նշել են, որ Թուրքիան հետևողականորեն ագրեսիվ քաղաքականություն է վարում։
«ՌԴ ԱԳՆ-ն իսկապես նամակ է ստացել ՌԴ Պետդումայի մի շարք պատգամավորներից, ովքեր առաջարկում են խզել այդ պայմանագիրը։ Ես կարող եմ նաև ասել, որ ներկա պահին առաջարկը պետք է քննարկվի։ Հետևաբար ամեն ինչ կարվի սահմանված կարգով։ Այս նախաձեռնությունը դեռ պետք է ուսումնասիրվի», — չորեքշաբթի ճեպազրույցի ժամանակ ասել է Զախարովան։
